معاني وأصول بعض العيل اللبنانيي

كلنا منحمل عيل ومنفتخر فيها بس قلال لي بيعرفوا أصل ومعنى عيلتن، لهيك حبينا نعمل بحث زغير عن بعض العيل اللبنانيي من مختلف الأطياف والمناطق بلبنان. ١. الحص والعيتاني الحص والعيتاني عيلة وحدة بأصولها وجذورها، تفرعت عبر السنين وهيي بالأصل عيتاني. يقال إنو عيلة العيتاني من العيل لي نزحت من المغرب على بيروت من بعد جلاﺀ العيل الإسلامية عن الأندلس. ٢. استانبولي ووارناؤوط: لي بيلفت النظر إنو أغلبية العيل البيروتية العريقة هي من أصل تركي وألباني وهل عيلتين هيك. استنبولي عبا عن لي جايي من اسطنبول وأرناؤوط هوي اسم يطلق على سكان ألبانيا أو “بلاد البلقان”. ٣. شمعون: جايي من الآرامي وبتعني الشخص لي بيسمع وأصل هل عيلة من جبل لبنان. ٤. ريشا: جايي من الآرامي كمان ويتعني القائد، نظراً لأنو “ريش” بالآرامي بتعني “الراس” وأصل هل عيلة جبل لبنان. ٥. اسكندر: إسم هل عيلة من أصل يوناني وبيعني حامي البشر أو المدافع عن الناس. ٦. الحسيني: نسبةً للحسين وبقولوا إنو أجداد هل عيلة إجو من شبه الجزيرة العربية على لبنان بعهد الدولة العباسية وسكنوا بكسروان بس صارت مجازر ضد الشيعة من قبل المماليك نزحوا على بعلبك. ٧. الموسوي: منسوب للإمام موسى الكاظم وهوي الإمام السابع عند الطايفة الشيعية وهني من سكان بعلبك الأوائل. ٨. درويش: إسم هل عيلة معرب من الفارسي بمعنى الزاهد الفقير المستعبد، أصل هل العيلة من سوق الغرب. ٩. افرام: عيلة من أصل آرامي وبتعني الشخص المثمر والمليان ثمار. ١٠. كيروز: هل عيلة موجودة أكتر شي بمنطقة بشري ودير الأحمر وبتعني “المبشر” لي بيحمل “الكرازات” يعني “البشارات” وأصل هل عيلة بعود لضيع جبة بشري. إنتو خبرونا، عن أي عيلة لبنانيي حابين نخبركن المرة الجايي؟ شوفوا كمان، ٣٥ كلمة لبنانية أصلها تركي.