١٣ محل مكنكن ببيروت لازم تزوروه بهالطقس

بدكن القعدة تكون دافية ومكنكنة؟ تعوا لنعرفكن عمحلاتنا المفضلة:

١. بيت، مار مخايل

هل محل عبارة عن بيت بيروتي عريق بحضر أطيب الطبخات البيتوتية وهوي عبارة عن مساحة ثقافية جميلة، نقوا تقعدوا بالزاوية المفضلة عندكن بالبيت مع اللقمة الطيبة. القعدة بقلب البيت دافية ومكنكنة بتشبه قعدة الستينات، يعني بس ناقصكن تسرحوا بخيالكن لبعيد وتستمتعوا بكل لحظة.

الرقم: 057 954 70

٢. معرض ألو بيروت، السوديكو

معرض ألو بيروت بجمعلنا أحلى صور من لبنان إيام اللولو ورح يرجعكن لإيام الزمن الجميل ويخبركن عن تاريخ بيروت لي ولا مرة انحكى. رح فيكن تتفرجوا على تركيبة البيت اللبناني القديم وتعيشوا حياة اللبناني 70 سنة لورا بقلب بيروت إنتو وعم تمشوا بقلب المعرض كأن عم تمشوا بشوارع بيروت الزمن الجميل وترجعوا تشربوا فنجان قهوة غير شكل.

الرقم: 746 746 01

٣. رصيف بيروت، الحمرا

رصيف بيت بيروتي بيجمع بين قهوة عريقة ومطعم أصيل وpub وبيت ضيافة بالطابق الفوقاتي. رح تلاقوا عندو جلسة ساحرة، تفاصيل بسيطة وقريبة للقلب ولقمة بيت.

الرقم: 081 340 01

٤. بيت كنز، شارع سرسق

بيت طالع من الأحلام رح ياخدكن رحلة بالزمن على إيام الماضي الجميل لي ما بينمحي من ذاكرتنا من خلال تفاصيل الديكور العريق والأمور البسيطة يلي بتضفي على المكان جو بيتوتي وشوية حنية على هل محل لي بقدملكن مونة جبلية وبيتمتع ببوتيك أرتيزانا فيها قطع أثرية وعتيقة .

الرقم: 098 777 81

٥. بوتشا، الأشرفية

بقدم بوتشا Puccia أصناف بيتزا إيطالية مخبوزة على الأصول بفرن على الحطب، باستا مطبوخة وصخنة، وسلطات فريش بأجواء مميزة. أول ما تفوتوا، بتلاقوا طاولات خشب، شرشف أحمر وأبيض، بتحسوا بأجواء رومانسية وحنية ما بتنوصف. جربوا البيتزا مارغاريتا لي أكتر شي مشهور فيا المحل. وكمان البيتزا النباتية، وإذا كنتوا موعودين بالباستا، هل محل رح يسحركن بس تاكلوا فيتوتشيني البيستو اللذيذة.

الرقم: 444 273 81

٦. بلو هاوس تي Blue House Tea، الجميزة

استمتعوا بأجمل قعدة دافية وبديكور خارج عن المألوف بيطغي علي لون الأزرق بهل محل. هل بيت بقدم الشاي على أصولو ومجموعة متنوعة من الوجبات الخفيفة والكوكتيلات. كل أصناف الشاي لي بيخطروا على بالكن موجودين من الشاي الأخضر، للأسود للبابونج والنعنع مع قطعة حلو، هيك فيكن دفوا بطنكن وتستمتعوا بجلسة حلوة ورايقة مع الأصحاب.

الرقم: 428 956 01

٧. دار الوردية، الحمرا

قعدة بيت وجو تراثي بيتوتي قديم وشوية تفاصيل زغيرة وحنية رح يخلوا هل محل يصير بيتكن المفضل. لي ما بيقدر يبعد عن البيت وجو البيت بهيك طقس، رح يحس هل شعور بهل محل ويتذوق أطيب لقمة.

الرقم: 348 373 01

٨. فيوري، الحمرا

فيوري بقدم باستا مطبوخة بتاخد العقل، موجود بشارع فود ديستريكت وعندو قعدة مهضومة ومكنكنة خرج سردة بالليل. هل مطعم الرائع هوي حلم إيطالي، فيكن تستمتعوا في بالأجواء الدافية مع الباستا والبيتزا الشهية وتقعدوا قعدة إيطالية مية بالمية مع كل مين بحب هيك قعدات وسردات.

الرقم: 915 819 81

٩. مايريغ، الجميزة

هل مطعم ساحر بكل ما للكلمة من معنى، بقدم أطيب الأطباق الأرمنية مع صحون الحلو وكريم كتير. وعندو كمان أطباق تجربة زغيرة لكل حدا حابب يجرب أكلة ومش عارف إذا رح يحبها والمشروب كمان كتير لذيذ. القعدة مهضومة كتير وcozy والأكل الأرمني بدفي القلب والبطن.

الرقم: 227 228 03

١٠. مزيان، الحمرا

الجو بمزيان مختلف عن الأجواء بمحلات تانية لأن بيجمع بين الحاضر والماضي وبقدم مجموعة أطباق من لبنان ومختلف البلدان العربية. فيكن تقضوا وقت لذيذ عندو بعد الضهر، إنتو وعم تلعبوا طاولة، تقروا كتاب أو حتى تاخدوا شوية عرق بلدي من يلي بحبوا قلبكن على أنغام وألحان أغاني قديمة.

الرقم: 015 293 71

١١. ة مربوطة، الحمرا

محل مهضوم بحضر طبق الصحن اليومي ولقمة بيتوتية وعندو قعدة بسيطة ومريحة. فيكن تقعدوا بالطابق الأرضي وتستمعوا بالموسيقى المختارة بعناية، أو تطلعوا عالطابق الأول المخصص للطلاب وتخلصوا شوية شغل عندكن ياهن.

الرقم: 880 743 01

١٢. بافاغلينو، الأشرفية

على درج مار نقولا قاعد مطعم إيطالي رومانسي، مزين بالورود والمصابيح والشرشف الأبيض والأحمر، بيعمل أطيب صحون باستا مع نكهات وخلطات أعشاب بتشهي. بس تكون الدني صحو، استمتعوا بالقعدة على الدرج الرومانسي وتذوقوا الأصناف الطليانية لي بتدفي القلب والبطن متل الباستا المطبوخة وصحون الشوكولا لي بدوب بتمكن.

الرقم: 080 091 81

١٣. ماريو إي ماريو، الأشرفية

ما بينشبع من المطبخ الإيطالي التقليدي، أصلاً بس يبرد الطقس منصير نبش تنبيش على الكنكنة والدفا لي رح تلاقوهن عند هل محل لي هوي عبارة عن جنة إيطالية بتلاقوا عندو أطيب أنواع المعكرونة الإيطالية المعمولة بحب وغرام مع خلطة سرية. بتجوا، بتلاقوا قعدة جوا بتاخد العقل وبتاكلوا أطيب أكلات إيطاليا وبتعملوا ذكريات ما بتنتسا.

الرقم: 036 888 76

شوفوا كمان، مطعم مكنكن بضهور شوير مع أحلى قعدة حد النار.