جواهر لازم تكتشفوها بعروسة البحر: البترون

البترون من أقدم المدن التاريخية بالعالم ومن أجمل الأماكن السياحية بالبلد، فيها أشهر المهرجانات، المحلات، المطاعم، الليموناضة، أكل البحر والمناقيش والأماكن الأثرية. هلق اليوم رح نخبركن عن الجواهر المخفية بالبترون ونشوف مميزات كل محل.

١. كنيسة سيدة البحار

كنيسة عظيمة نايمة على البحر من القرن التاسع عشر، وتميزت هل الكنيسة بموقعها المشرف والمطل على الساحل. تصميمها بيشبه للكنايس والكاتدرائيات بأوروبا فيها قباب عملاقة وحجر عتيق بحسسكن بالدفا. كل شي بهل كنيسة بخليكن تشعروا إنكن سافرتوا على شي جزيرة باليونان أو قبرص.

٢. فرن كوكو

فرن كوكو رمز من رموز البترون وما فيكن تجوا على البترون من دون ما تمرقوا عند كوكو. صرلو أكتر من 60 سنة فاتح بنص سوق البترون وعم بقدم أشهى المخبوزات، وانشهر أكتر شي بالبريوش الطري، السخن، وأكيد الطازة يلي بقدموا مع طلسة شوكولا! ومش بس هيك، فيكن تختاروا بين البريوش السادة، أو البريوش على شوكولا. في شي أطيب من عجينة محشية شوكولا مع القهوة الصبح؟ وإذا بدكن كمان بعد، دايماً في مناقيش.

الرقم: 314 430 03

٣. سي سالت

بيت حجر نايم على البحر دغري. بس تفوتوا، رح تنسحروا من الديكور والألوان والتصميم للأوتيل المميز-مكان بياخدكن على عالم كلو سحر متل بالقصص. الأوض كلها من حجر والديكور في نفحة بترونية بتخلي قلبكن يدق. الأوض مزخرفة بالأبيض والأزرق مع ألوان البترون ومن البلكون بتشوفوا البحر تحت إجريكن.

الرقم: 128 333 70

٤. بترونيات

مطعم تراثي من كلاسيكيات البترون مزين بقناطر الحجر وبقدم أطيب أكل لبناني تقليدي ومونة بلدية مع جو فينيقي أصيل وقعدة خشب وتراس برا على العشب بياخد العقل.

الرقم: 510 744 06

٤. شارع المغتربين

شارع المغتربين أو الDiaspora Village من أكتر المحلات الأثرية بالبترون. صراحة أول ما تفوتوا على هل قرية رح تشوفوا الجمال البتروني بأبهى حلة، بيتألف من سلسلة من المطاعم والمقاهي ومحلات لبيع الأشغال اليدوية والمونة اللبنانية، بالإضافة لبيوت ضيافة أثرية.

الرقم: 631 634 03

٥. ليموناضة ناجي

بس تخلصوا غدا ما تجربوا تاكلوا حلو لأن الليموناضة بالبترون مش على طول فيكن تحصلوا عليا وأكيد لي بيجي على البترون وما بيشرب ليموناضة ما كأن عمل شي. الليموناضة عند ناجي محضرة من مكونات طبيعية ومطعمة بالحامض من دون ما تكون دلعة، بشتربوا الليموناضة وبتكفوا مشواركن بالسوق العتيق.

الرقم: 897 323 03

٦. السور الفينيقي

هل سور فيو سحر بيرجع لآلاف السنين لورا لإيام الفينيقيي ومتل ما بقولوا البترون مدينة فنيقية بكل شي فيها وأهم شي حياة البحر وصيد السمك وصناعة النبيد لي كانت تميز البحارة الفينيقيي. زوروا قطعة من التاريخ اللبناني القديم وتأملوا شوي لبعيد. بيمتد هل الجدار التاريخي على طول 225 متر وهو بسماكة متر لمتر ونص، وعلى الرغم من إنو أقسام عديدة منو اختفت للأسف لكن معظمو مازال صامد بوج الزمن.

٧. ماريولينو

أول ما توصلوا على هل محل بتحسوا حالكن بجنة زغيرة بروما، بتبرموا بتلاقوا اللمبات الخافتة معلقين على الشجر وبتفوتوا لجوا بتلاقوا القناطر والزريعة وشباك بيت جدي وألوان على مد عينكن والنظر. رح تنغرموا بالبيتزا يلي بيعملها، شوفوا كل الأحجام والطعمات وجربوا السلطات والمأكولات البحرية الساحرة. صراحة كل شي بهل محل رح يخليقكن تتعلقوا بالبترون أكتر وأكتر ويصير بدكن ترجعوا تعيشوا هل تجربة مرة تانية وتالة والعمر كلو.

الرقم: 555 766 76

شوفوا كمان، جواهر مخفية لازم تكتشفوها بضيعة حدشيت الساحرة.