تعرفوا على أجمل ٦ ضيع بجنوب لبنان

اليوم رح نطلع مشوار على الجنوب، نستكشف كم ضيعة بمساحاتها الخضرة الغنية والآثارات القديمة. كرمال هيك، جبنالكن ٦ من أجمل الضيع الجنوبية متل الجنات على الأرض. كفوا معنا لتعرفوا اكتر.

١- جزين

ضيعة جزين مخباية بين الجبال وتعتبر من أجمل المناطق بلبنان كله. عندها إطلالات جبلية بتاخد العقل وشلالات غزيرة بتغني أرضها. بتبلشوا نهاركن ب Blue Jay Valley، واحد من أجمل الأوتيلات بلبنان كله، وبتكفوا على مطعم الشالوف، بيبعد بس كم متر عن شلال جزين المشهور، بقدم أكل لبناني على أصوله ولحمة نية غير شكل، مع قعدة روعة. إذا حابين تعيشوا الأجواء الريفية، فيكن تميلوا على كيف جزين، بيت مزرعة وقعدة مميزة ومكنكنة بين الورد والخضار، بيقدم أكل لبناني أصيل ومنتجات بيتوتية ليكمل مشواركن على الآخر.

٢- بكاسين

بتلاقوا أكبر غابة صنوبر بالشرق الأوسط بضيعة بكاسين، وإحتوائها على هيك مساحات خضرة واسعة عملها وحدة من أجمل القرى اللبنانية. فيكن تتمشوا بسوق الضيعة القديم وتتفرجوا على البيوت التراثية الحمرا، وتزوروا أجمل الكنائس بلبنان. بكاسين معروفة بالصنوبر وزيت الزيتون، كرمال هيك ما تنسوا تذوقوا من خيرات المنطقة بمحلات الضيعة. قضوا الليلة ب Maison de la Forêt ، واحد من أروع الأوتيلات بلبنان اللي بقدم بيوت ضيافة خشبية بنص غابة بكاسين. فيكن تكفوا تاني نهار المشوار على Karam Winery ، وتجربوا نبيد المنطقة المعمول على القد بطعم غير شكل.

٣- جرجوع

هالضيعة ساندة على تلال جبل مليتا، ضيعة جرجوع ساحرة بالطبيعة والخضار ومحضونة بغابات من شجر البلوط. بتحتوي جرجوع على مناظر بتعبي عينكن. فيكن تاكلوا لقمة على سفرة مليانة بمطعم هوا جرجوع، مطل على سفوج الجبال الخضرة. وبعد ما تاكلوا، فيكن تنزلوا على نبع الطاسة وتعملوا قعدة بالبرية كتير مهضومة وعلى صوت المي.

٤- كفرحونة

بلدة كفرحونة بقضاء جزين بتاخد العقل، معروفة بالخضار الشاسع، المنتجات العضوية والبيتوتية، والمشاهد التلجية الرائعة بفصل الشتا. فيكن تزوروا هالبلدة الحلوة، تتمشوا بشوارعها العتيقة وتتفرجوا على كنيسة مار جرجس العريقة، وإنتو هونيك، بتلاقوا محل صاج على باب الكنيسة، بتدقوا من خبزه اللي بشهي.

٥- الريحان

إسم على مسمى، هيدي الضيعة معروفة بغناها بنبتة الريحان أو الحبق. هالمنطقة بتجذب الناس كتير بسبب شجر الصنوبر ومشاهد غروب الشمس المميزة والمغارات الطبيعية. تمشوا بالضيعة واكتشفوا كنوز تراثية وثقافية بالمكتبة الوطنية. وأكيد بتكفوا على مغارة الريحان، اللي بتحتوي على صخور وحيطان محفورة طبيعيا بميّ الشتي. ولتعرفوا أكتر عن المغارة، اتصلوا على الرقم: ٧١٤٦٧١٦٤ .

٦- مرجعيون

قاعدة منطقة مرجعيون على تلة عالية من الخضار والشجر، وتسميتها للضيعة بترجع لغنى أرضها بمصادر الميّ العديدة. ميلوا على الضيعة، تفرجوا على ساحتها وسوقها العثماني القديم، وتمشوا بين بيوتها الأثرية اللي بعدن محافظين عليها. بتاكلوا سندويشة فلافل غير شكل من عند فلافل موريس وبعدين بتطلعوا على قلعة شقيف، هالقلعة الأثرية اللي عمرها ١٠٠٠ سنة وبتطل على مشاهد روعة لنهر الليطاني وجبل عامل وحتى شمال فلسطين. القلعة بتفتح كل يوم، من ٨ الصبح حتى ٧ ونص بالليل.

شوفوا كمان، ٧ من أشهى الأكلات الشعبية بضيع الجنوب