تعرفوا على أشهى ٦ محلات حلو بالجنوب

الحلو عالم تاني، من الكنافة والبقلاوة والحلو الشرقي لأطباق الوافل والكريب والشوكولا الدايبة. طلعنا اليوم على الجنوب، وجبنالكن أطيب حلو من أشهى ٦ محلات بالمنطقة. كفوا معنا لتعرفوا تفاصيل أكتر.

١- حلويات الديماسي – النبطية

بتلاقوا بين أسواق النبطية الشعبية محل الديماسي، صرله بقدم أطيب حلو شرقي بالمنطقة من ال١٩٤٩، محافظ على جودة ونوعية الطعم التراثي الأصيل من سنين. بيعطيكن صوانيه معرمة من الحلو وبقدم أطيب كنافة على الصبح.

الرقم: ٧٠٩٠٨٩٠٩

٢- وافل – صيدا

اختصاص هالمحل الوافل المقرمشة مع الكريمة، مقدمة مع الشوكولا البلجيكية والنوتيلا والبوظة وبسكويت اللوتس والفواكه والمكسرات وغيرها من القصص الي بتفتح النفس. وفيكن تجربوا معها مختلف أنواع الميلك شايك بالمانغو أو الفريز وغيرها.

الرقم: ٨١٩٢٩٨٣٥

٣- كوكتيلا – صيدا

بقدم كوكتيلا كريب بالقشطة بياخد العقل، كمان بتلاقوا وافل مع بوظة ايطالية وشوكولا بالبندق مع الكيندر، حصتها كبيرة ومحرزة. وأكيد ما بتضهروا بلا ما تجربوا كوكتيل الفواكه من عنده، كباية معباية لراسها بمختلف أنواع الفواكه الشهية والطازة لتنعشكن.

الرقم: ٧١٥١٥١٥٥

٤- حلويات كنعان – صيدا

كنعان من أطيب المحلات بالجنوب، بقدم حلويات عربية بطعم فاخر، وبيعمل كيك غير شكل، ومع شوكولا بتاكلوا صبيعكن وراها. التقديم والمنظر والطعم عالم تاني.

الرقم: ٠٧٧٢٩١٠٤ | ٠٧٧٣٣٣٣٠

٥- موغي تي – النبطية

جربو الحلو على الطريقة اليابانية! بان كيك ناعمة وطرية بأطيب الطعمات من التيراميسو والفريز والأوريو والشوكولا، عداً عن حلو Dorayaki الياباني مع الجبنة ، وبتطلبوا الإضافات اللي بدكن ياها من الماتشا وكريم تشيز والفاكهة والصوص وغيرها. وأكيد لازم تجربوا معن الميلك شايك أو الشاي بالحليب بمختلف الطعمات المميزة.

الرقم: ٠٣٠٨٥٨٠٣

٦- أبو زهير – صيدا

مقصدكن الأول للسحلب خاصة بهالطقس، محل صيداوي صرله من ١٩٣٦ بقدم الحلو على الأصول وبطريقته الخاصة، من الرز بحليب والمهلبية مع غزل وعسل للبوظة والعصير الفريش، شي بشهي.

الرقم: ٨١٠٣٣٥٤٠

شوفوا كمان، ٦ كافيهات مع قعدة جنينة ساحرة ببيروت