بتعرفوا إنو في ضيعة تركية بقلب عكار؟ شوفوا معنا على هل قصة

الكواشرة بالشمال، ضيعة عكارية بعود أصول أهلها لتركيا بالزمانات. يقال إنو أهالي ضيعة الكواشرة جايين من عشيرة “غوشير” من منطقة كونيا التركية، قصدوا الساحل السوري ومن بعدها الساحل اللبناني واستقروا بالكواشرة.

صح غابت الإمبراطورية العثمانية عن المنطقة وانطفى سلطانها لكنها من أكتر من 400 سنة تركت ذكرى لإلها بضيع الأطراف بالشمال، عند ضيعة الكواشرة.

الكواشرة عبارة عن قرية من لحم ودم، بيوت وسكان بيحملوا الهوية والإنتماء اللبناني لكنن بينطقوا اللغة التركية إلى جانب اللغة المحكية.

ما بتغيب العادات التركية عن أهل الكواشرة، الزي التقليدي، الكوفية والإشارب التركي، الشروال التقليدي، القهوة التركية الأصيلة، وبيوت الحجر الأسود.

أكتر شي معروف بالضيعة هي البحيرة، الكل بيقصدها ليجي يعمل سياحة أو ليتفرج على الطبيعة الحلوة من خلالها. عدد كبير من أهالي الكواشرة وعيدمون والبيرة بيشتغلوا بالزراعة وتربية المواشي بعد ما كانوا قديماً يشتغلوا بحياكة السجاد التركي.

الكواشرة عروسة عكار ومشهورة ببحيرتها الساحرة الغنية بالطيور البحرية والمي العذبة، فيها جامع أثري بساحة الضيعة وشجر وخضار وحجارة أثرية. بس يجي عبالكن تروقوا راسكن بهل منطقة، بتجوا على البحيرة وبتخلوا افكاركن تسرح إنتو وعم تشوفوا المي.

حياكة الحصيرة والقش من أبرز الصناعات المحلية إلى جانب التياب القديمة مع لمسة تركية.

لكل حدا حابب يكتشف جانب آخر من لبنان، جانب مليان سحر وتقاليد قروية لازم يزور الكواشرة ويدوق أطيب مناقيش على التنور من تحت ديّات نسوان الضيعة ويجرب الأكلات الكواشرية متل “اللبنية” أو القمح بلبن لي معروف بال”القاش” بالتركي ولي تعتبر من أطيب الأكلات التركية التراثية بالضيعة.

العادات التركية بعدها حية بين أهالي الضيعة وأهمها الإحتفال “بليلة الحنّة” قبل العرس للعروس، البنات بحنوا العروس هني وعم يرقصوا ويغنوا لابسين تياب تقليدية مزخرفة.

الكواشرة من أجمل ضيع عكار! صح الجيل الجديد غير الجيل القديم وصاروا ما بيعرفوا عن اللغة والعادات قد أهلن بس بتبقى العادات الحلوة متناقلة بين الأجيال.

شوفوا كمان قصة هل أوتيل المهجور ببكفيا يلي كان مدينة بحد ذاتو.