٦ مطاعم بقلب غابات لبنان الساحرة

لبنان غني بالمساحات الخضرا وغابات الصنوبر والأرز اللي بعده محافظ عليها، وتراثنا وأكلنا أغلبه مربوط بالمناطق الطبيعية من البحيرات والسهول والجبال والغابات. كرمال هيك، جبنالكن ٦ مطاعم بقلب غابات لبنان الساحرة لغدا غير شكل. كفوا معنا لتعرفوا التفاصيل.

١- La Maison De La Foret – بكاسين

مطعم بنص غابات الصنوبر بمنطقة بكاسين الحلوة، بتاكلوا أكل لبناني طيب وبتشموا هوا نضيف وبتستأنسوا بالقعدة المحضونة بالشجر الشامخ اللي صرلو سنين، عنجد متل الجنة على الأرض.

الرقم: ٠٧٨٠٠٢٢٢ | ٧٨٨٢٨٢٥٢

٢- مطعم الكابتن – زغرين، المتن

بعد في أحلى من سفرة لبنانية مليانة وملونة بين الشجر؟ المطعم محضون بالشجر الشامخ ، بتحسوا حالكن عم تتغدوا بنص الغابة وكيف ما برمتوا بتلاقوا خضار وجمال لبنان. عنده جلسة كلاسيكية بالهوا النقي، شي برد الروح و بيفتح النفس على الآخر.

الرقم: ٠٣٨١١٨٦٧

٣- مطعم جنة الأرز – الأرز

مطعم جنة الأرز قاعد على راس الجبل، محاوط بشجر الارز الشامخ بالشمال، قطعة من جنات لبنان بتحسوا حالكن فيها كأنوا قاعدين فوق الغيوم، وعم تتفرجوا على أجمل المناظر الطبيعية. بتلاقوا أروع قعدة جبلية مع سفرة بتاخد العقل وكاسة عرق.

الرقم: ٠٣٧٤٣٧٦٠

٤- مطعم تلة نصر – بكفيا

مطعم تلة نصر قاعد على الجبل بمنطقة بكفيا، ومحاوط بشجر الصنوبر العتيق بالمنطقة. بقدملكن سفرة لبنانية معرمة ومعمولة على الأصول وبكل كرم. رح تحسوا انه كل لقمة أطيب من التانية، خاصة مع الإطلالة الجبلية الروعة.

الرقم: ٠٤٩٨٣٥٤٩

٥- كافيه الأرز – بشري

انتو والأرز جيران! الكافيه بيستقبلكن على لقمة لبنانية بتشهي بين شجر الأرز الشامخ ببشري. رح تحسوا انكن رحتوا على عالم ساحر من الرواق وبين القعدة الجبلية اللي بترد الروح. وإذا بتروح بالشتوية، المنظر مع التلج روعة على الآخر.

الرقم: ٧٠٤٤٨٧٩٧

٦- لوس – جزين

لوس معروف بسفرته الكريمة ولقمته الطيبة وإطلالته اللي بتاخد العقل. قعدة بتفتح النفس بين أحضان شجر الصنوبر وطبيعة جزين مع أكل لبناني ملون ومعمول على الأصول. ما بتضهروا من المطعم إلا ومبسوطين.

الرقم: ٠٧٧٨٠٣٣٠

شوفوا كمان، شوفوا ٥ مطاعم جبلية بتاخد العقل