لقينا ٥ من أجمل الفنادق الموجودة بجبيل

بيجي على بالنا نقضي فترة العطلة بمحل مميز لو ما قدرانين نسافر. ومن أجمل الأماكن يلي فيكن تقصدوها لتسترخوا بنهاية السنة وبفترة الأعياد مدينة الحرف، جبيل. تعتبر مدينة جبيل من أشهر وجهات السياحة بلبنان خاصةً بفترة الأعياد لأن رح يكون في سوق الميلاد والشجرة والمواقع الأثرية بالإضافة لوجودها على البحر، مليانة بالفنادق المميزة والراقية والمطاعم والمرافق السياحية، يلي بتتمتع بأفضل الخدمات أو بإطلالة ساحرة على البحر بترضي جميع الأذواق. من بعد ما شفنا أجمل الأوتيلات الموجودة بإهدن، اليوم رح نعمل كزدورة على أجمل أوتيلات جبيل يلي بتستاهل زيارتكن.

١. أليف بوتيك أوتيل Aleph Boutique Hotel

أوتيل بيشبه الحلم، بيتمتع بإطلالة على القلعة والبحر وبيمزج بين التاريخ والحاضر من خلال توفير جميع وسايل الراحة والإستراحة الأنيقة مع منظر ساحر. رح يخليكن هل مكان تكتشفوا جمال جبيل الساحر لأن محاط بكل المواقع الأثرية، بهل محل فيكن تعيشوا تجربة الفخامة وتستمتعوا بالجاكوزي الراقي وبالأكل الطيب والقعدة الخيالية.

الرقم: 333 945 09

٢ فندق ماجيستيك بيبلوس غراند Majestic Byblos Grand Hotel

جبيل من أجمل المناطق على البحر ولي بعد مش مقضى عطلة فيها صار وقت يروح يستكشف هل منطقة ويعمل رحلة من العمر ويبرم كل زاوية. هل أوتيل مطل على البحر، الغرف بقلبو كتير مرتبين وفيكن تستمتعوا بقعدة شرقية، الجاكوزي، المطعم الفخم لي بقدم أكلات مميزة، وتسترخوا وتعيشوا لحظات حلوة. هل أوتيل بيشبه قصر الأميرات من خلال التصميم العريق، القناطر العظيمة والغرف الفخمة.

الرقم: 850 550 81

٣. فندق بيبلوس ستار Byblos Star Hotel

أوتيل مرتب ومهضوم موجود بشارع مار جرجس بخلي الزوار يتمتعوا بإقامة مريحة، الأوض شرحة وبتتميز بديكور عصري وأنيق، وهيك بتقضوا وقتكن إنتو وعم تسترخوا وتستمتعوا بفيو حلو بوحدة من أجمل المناطق السياحية بلبنان.

الرقم: 631 613 03

٤. بيبلوس سور مير Byblos Sur Mer

بقدم أوتيل بيبلوس سور مار تجربة خيالية للزوار نظراً لموقعو على مينا جبيل الأثرية وديكورو الفخم وأجنحتو الراقية وخدمتو الممتازة، وهوي بيتمتع بأوض مرتبة، مطعم بقدم مأكولات بحرية وكافي تورنوسول لي بقدم مأكولات عالمية. هل أوتيل رح يخليكن تعيشوا تجربة استثنائية ولحظات رومانسية بسبب الديكور الراقي والطلة على البحر الخيالية.

الرقم: 000 548 09

٥. مونوبرج Monoberge Byblos

بقدم قعدة بيتوتية من خلال الغرف المميزة بديكورها والجو الدافي. الأوض بتطل على المواقع الأثرية بجبيل ورح تخليكن تنغرموا بهل منطقة من أول وجديد. الأوض مرتبين كتير ومكنكنين مع برادي داير من دار وتكايات ملونة، والحيطان فيها واجهة حجر، بس توقفوا وتتأملوا لبعيد رح تحسوا الشبابيك مفتوحين على حكايات الخيال.

الرقم: 999 550 09