٥ مطاعم باستا لازم تجربوها بلبنان

من بعد ما خبرناكن عن محلات بتعمل ساندويشات طاووق غير شكل، اليوم منخبركن عن مطاعم الباستا.

الباستا من أطيب الأكلات الشتوية لي بتجي على بالنا بهيك طقس، مع صوص بشاميل ولا أطيب وكاس نبيد وقعدة حد النار. كل المشاعر الحلوة رح تخليكن تمبسطوا بالقعدة وتتلذذوا بكل لقمة، خلينا نعمل برمة على ٥ من أجمل المطاعم لي مش معودين تروحوا عليها ونستكشف شو سر كل محل.

١. بيتزايلو Pizzaiolo، قبر شمون-بيصور

المشوار مبلش من ضيعة بيصور بعاليه لي مش بعيدة كتير عن بيروت وتحديداً بهل محل المهضوم لي بحضر أطيب لقمة إيطالية. القعدة بهل مكان مكنكنة ودافية، بتفوتوا بتشموا الريحة الطيبة وأكيد رح تستحلوا الباستا. الباستا مع صوص بشاميل ولا أطيب، مع فطر وجبنة وبتتقدم بطريقة كتير فريدة من نوعها مع حبة نعنع ورشة جبنة على الوج! فيكن تختاروا تدوقوا البيتزا على الحطب أو اللازانيا وترجعوا تتحلوا بيتزا على نوتيلا.

الرقم: 111 412 05

٢. مارغريتا بيتزيريا Margherita Pizzeria، جونية

هيدا المطعم موقعه كتير مميز، موجود على البحر بشوارع جونية، وعندو تراس غير شكل وقعدة كتير حلوة-أما أكلو فعنجد بشهي. بقدم كل أصناف منطقة نابولي على أطباق بيضة مزينة بالصلصات الطليانية وكمان بيعمل حلو على الطريقة الطليانية. مارغاريتا بحضر تشكيلة واسعة من الباستا المعمولة بصوصات مختلفة رح تاخدكن على إيطاليا من أول كدشة متل السباغيتي ألا نيرانو، الترافل باستا والمعكرونة مع صلصلة البشاميل الشهية.

الرقم: 798 711 81

٣. أوتانتيكو ريستورانتي Autentico Ristorante، بعبدات

مطعم إيطالي كتير طيب ومرتب ومناسب لقعدة رومانسية. عبالكن تدفوا بطنكن؟ القعدة حد النار مع كاس النبيد من العمر! جربوا السباغيتي ألا كاربونارا الشهية أو السباغيتي بومودورو مع صلصة بندورة سحرية وقطع جبنة روعة.

الرقم: 124 074 81

٤. دا صوفيا، بدارو

جوهرة مخفية بمنطقة بدارو ببيروت بيتمتع بجو رومانسي وبيتزا وباستا رح تجذبكن دغري. بتتميز القائمة الإيطالية بأطباقها التقليدية متل باستا بالمأكولات البحرية، معكرونة كاربونارا، البيتزا، الريزوتو، و كتير غيرهن! ساحر وخفيف الإضاءة بيجذب كل العشاق حول قعدة رومانسية وشوية أكل طيب مع كاس نبيد.

العنوان: أويتل The Smallville، بدارو، بيروت

الرقم: 552 995 70

٥. بيفي سكوير Bevvy L’Italiano، مزيارة

مزيارة ضيعة حلوة كتير وفيها مناظر حلوة وقعدات وكافيهات مهضومين. إنتو وعم تكتشفوا الضيعة زوروا بيفي سكوير لي بيتفنن بتقديم أطيب المأكولات الطليانية مع لمسة سحرية وبجو مكنكن ومهضوم. القعدة عندو مثالية وخرج كل مناسباتكن.

الرقم: 995 570 06