تعرفوا معنا على ٧ أكلات شعبية بالمناطق الجبلية بلبنان

معروف عن أهل القرى والضيع الجبلية العالية ميلن لتحضير الأكل المليان والنشبع بالدهون واللحم، من ميلة كرمال يحصلوا على السعرات الحرارية والطاقة، ومن ميلة تانية حتى يوفروا الدفى بطقس مناطقن البارد. شرفونا اليوم وخلينا نتعرف على أبرز الأكلات الشعبية الجبلية حول لبنان.

١- فتة الباذنجان

فتة الباذنجان او التسقيّة طريقة خاصة بأهل الجبل، خاصة بمناطق الشوف والمتن، بتحضير الفتة الشهية، واللي بتنعمل بقطع الباذنجان المقلي مع اللحمة المفرومة واللبن والخبز المقلي.

٢- العدس بوشوشة

وهي أكلة مشهورة بضيع أعالي المتن الشمالي وبعض القرى الشمالية، بتنترك حبوب العدس كاملة لتنضج، وبعدين منزيد عليها قطع القلقاس الأبيض المسلوق (بوشوشة) مع التوم والكزبرة وعصير الحامض، وهالأكلة بتعطي دفى كتير.

٣- كبة الراهب

طريقة لذيذة لتحضير الكبة ومعروفة بمناطق الشمال وجبل لبنان، بتنعمل على شكل كريات أو طابات وأوقات بينزاد عليها الدبس، كتير بتشبع بفصل الشتا.

٤- الكشك مع سلطة الهندبة

الكشك مشهور بكل لبنان، وكل منطقة عندها طريقتها، وهو بالأساس أكلة جبلية لأنها بتنعمل من لبن الماعز اللي بعيش بالجبل، بس الكشك بضيع المتن الأعلى وعاليه بحطوله زيت وبينرشّ فوق الهندبة الخضرا ليتحول لسلطة مميزة بالحامض والزيت والبصل المفروم وحبات الرمان اللفاني الحامضة.

٥- الغمّة

معروفة كمان بإسم الفوارغ والكروش والكراعين، وأوقات بزيدوا عليها راس الغنم واللسانات، أكلة دسمة ومحرزة وصعبة شوي بالتحضير.

٦-القمحية أو الهريسة

وهي عبارة عن قمح مسلوق، بزيده عليه قطع اللحم والدهن. بسموها “القمحية” ببعض قرى الضنية، وبتنطبخ على الحطب. وهالأكلة مشهورة بالقرى الجبلية لغنى هالمناطق بمكوناتها.

٧- قراص الكبة بشحمة

طبق كبة غني باللحمة، وعادة بقدموها مشويّة مع الشوربات السخنة المطبوخة على الحطب، أطيب شي ممكن تجربوه بالشتوية والطقس البرود.

شوفوا كمان، شوفوا ٥ مطاعم جبلية بتاخد العقل