كستنا وحطب ودفى…شوفوا أكلات منعملها على الصوبة كل شتوية

بلشت الشتوية وطقس البرود بكل مناطق لبنان، وأغلب أهل الضيع حطّوا الصوبا تجهيزاً للموسم، ولأنه معوّدين يجي مع كل فصل اكلاته ووصفاته الدافية اللي منحبها، جبنالكن أكلات اللي مجرد ما يبلش الشتي منجتمع كلنا حد الصوبا ومنحضرها مع بعض. كفوا معنا لتعرفوا اكتر.

١- البطاطا الحلوة المشوية

منغلف حبّات البطاطا بورق الفويل للطبخ ومنحطها جوات الصوبا (الأطيب إذا الصوبا على الحطب)، مننطر عليها شوي لتبلش البطاطا تصير طرية. طعمها حلو وسناك برافق كل الأمسيات العائلية بالشتي.

٢-الكستنا المشوية

بتقصوا الكستنا بالسكينة من جوانبها، بتصفوهن فوق الصوبا، وبتنطروا ليبلشوا يتفتحوا لحالن ويصير قالبن طري وجاهز للأكل، كمان من أطيب المقبلات وقت الشتي!

٣-عرانيس مشوية

غالباً ما كمان بتنعمل مع الكستنا، شغلتها هينة، بتحطوهن فوق الصوبا أو جواتها وبتنطروا عليهن ليطلعوا مشويين منيح، وما تنسوا تضيفوا البهارات اللي بتحبوها مع قطع الحامض!

٤-عرايس كفتة مشوية

بتمدّوا الكفتة النية على رغيف الخبز العربي، بتطبقوا الرغيف على بعضه وبتحطوها على الصوبا لتنشوي وتصير طعمها مميز!

٥- شوربة العدس

معقول ننسى شوربة العدس معمولة على الحطب؟ الوصفة ما بتختلف بس بتاخد وقت اكتر على الصوبا لتغلي، بس بتطلع طعمتها غير شكل!

٦- مناقيش أو صاج

ترويقة مميزة ببرود الصبح، بتحطوا المكونات اللي بدكن ياها على خبز المرقوق أو الصاج، وبتنطروا لتخلص منقوشتكن البسيطة والطيبة.

شوفوا كمان، تعرفوا معنا على ٧ أكلات شعبية بالمناطق الجبلية بلبنان