٥ مطاعم لازم تجربوها لأطيب ترويقة بلبنان

ما بيكمل نهارنا بلا الترويقة الصبح! مشوا نعمل برمة زغيرة بلبنان، ونجبلكن ٥ مطاعم لازم تجربوها لأطيب وأغنى ترويقة. كفوا لتعرفوا اكتر.

١- كعكة سكوير – مار مخايل، بيروت

هالمحل بقدم كعك طازة من الفرن بتشق القلب، الكعكة محشية بمختلف المكونات متل الكشك، الخضرا الطازة، والجبنة الدايبة، واللبنة البلدية، والزعتر، وغيره من الطعمات الروعة. ما بتضهروا إلا مبسوطين.

الرقم: 01/568095 – 81/197717

٢- قهوة باب السراي – صيدا

هالقهوة بتقدم قعدة عربية وسفرة أصيلة ومليانة، مناقيش طازة على انواعها، وصحون فول معرّمة، والفتة المزينة بالكاجو، والمشوشي اللي بتشهي، وترويقة بيض وجبنة ولبنة مع خضرا إذا عبالكن شي خفيف.هالترويقة التراثية ما بتكمل من دون جو على البلدي، الديكور على الدقّة القديمة من شبابيك مقنطرة وكراسي خشبية وموسيقى القديمة، هيدا عدا انه بتطل على سوق صيدا العتيق.

الرقم: 81/640444

٣- مطعم أبو عبد الله – الدورة، بيروت

هالمطعم بيعمل صحون فتة معجوقة بالكاجو، فول مدمس وحمص مغنّجين بزيت الزيتون، حمص بحرّ وغيره، كلّه مقدم مع صحون الجبنة واللبنة المغمورة لراسها بزيت الزيتون مع رشة زعتر، وأكيد البيض المقلي مع اللحمة المفرومة أو السجق، بتغمسوا خبزتكن بالصحن وبتاكلوا لقمة غير شكل!

الرقم: 01/256286

٤- مطعم فتة وفول – دميت، الشوف

مطعم لبناني بالضيعة مع على الطبيعة الجبلية، معروف بصحون فتة مميزة بكرمها وأصالتها، ترويقته غنية ومليانة، بتلاقوا عندو فول مدمس وفول فلسطيني وحمص مع كاجو ولحمة وبيض المقلي بالفخارة ومناقيش على الصاج بمختلف الطعمات من الزعتر والجبنة والكشك وغيره، هيك بيكمل نهاركن على الآخر.

الرقم: 05/720910 – 03/005311

٥- مطعم خان الجبيل – الجبيل

بتاكلوا أطيب ترويقة لبنانية بين شوارع وأسواق الجبيل العريقة، بقدملكن صينية محرزة من المناقيش الطازة والسّخنة، مع لبنة وجبنة وخضرا وفول وفتة وحمص وغيره، وأكتر من هيك عندو مناقيش زعتر مع لبنة مكعزلة وخضرا شكلها وطعمها بشهي!

الرقم: 09/544599

شوفوا كمان، ٨ كافيهات خريفية مكنكنة لأطيب فنجان شاي