دوقوا أطيب وأغنى صحن فول من عند فول بيتوتي

ما في أطيب من انو تبلشوا نهاركن بترويقة محرزة وغنية. كرمال هيك، رحنا على حارة حريك ولقينا مطعم فول بيتوتي لأطيب ترويقة فول وحمص معمولة غير شكل وبكل كرم.

هالمحل بقدملكن مانيو متنوعة من الفول والحمص والفتة و السجق واللحمة، وعنده وصفاته الخاصة اللي بتميزه عن غيره بالمنطقة، بتاكلوا أطيب لقمة على الصبح مع سرفيس مرتب!

بتلاقوا مختلف أصناف الفول من المدمس للبيتوتي وفول الشيف المميز، وعندن طبق الفول البيتوتي طيب وغني، بيخلطوا الفول مع الكبيس والبصل والبندورة والبقدونس وبرشّوا أطيب البهارات وبيغمروا الصحن بزيت الزيتون، بيتقدم مع خضرا وزيتون وخبز طازة.

أمّا فول الشيف غير عالم، بيجي بخلطتو وطعمتو الغير شكل.

واكيد ما تنسوا تجربوا صحن الحمص البيتوتي، الحمص مخلوط مع كبيس لفت، زيت ونعنع ومرشوش عليه خبز محمّص، وبتلاقوا كمان المسبّحة الشهية والحمص بالطحينة والحمص مع اللحمة أو السجق و القورما أو المقانق حسب شو عبالكن، أطباقن مليانة لراسها.

إذا انتوا من محبي الفتة رح تكيفوا، عندن فتة مع لبن وكمان فتة مع لحمة وحتى فتة طحينة، صحنكن مغنج بالكاجو والمكسرات بيشبّع كل النهار، وكمان بتلاقوا السجق والمقانق والبيض المقلي مع لحمة لتكملوا قعدتكن الصباحية.

للمزيد من المعلومات، فيكن تتصلوا على 71/474740

شوفوا كمان، ٥ مطاعم لازم تجربوها لأطيب ترويقة بلبنان.