أشهر أكلات عيد الميلاد بلبنان

إجا العيد لي الكل بينطروا من سنة لسنة، بهل فترة بيجتمعوا العيل والأهل والولاد على سفرة وحدة ليحتفلوا سوا ويرجعوا يوزعوا هدايا من بعد الأكل أو يروحوا على قداس نص ليل. هل ليلة بتكون حافلة بالأكل الطيب والأطباق التقليدية متل الكبة المشوية وحبشة العيد، المغلي وغيرن. خلينا نخبركن عن أشهر الأطباق لي بتنوجد على سفرة الميلاد بلبنان.

١. رز بلحمة

كتار بينطروا ليلة الميلاد ليعملوا أكلة شتوية دافية، ومن هل أكلات “الرز بلحمة” مع قلوبات على الوج وشوية صوص على جنب. هل أكلة بتشبع منيح وبتتقدم كطبق رئيسي صخن من بعد ما تاكلوا السلطات والمقابلات السريعة.

٢. حبشة

الحبشة أو الديك الرومي عبارة عن أكلة ميلادية تراثية موجودة بكل بيت لبناني بس بسبب الأوضاع الصعبة صاروا كتار يستبدلوا الحبشة بالرز على لحمة بس بتبقى هل أكلة إلها مكانتها الخاصة. الحبشة عبارة عن دجاجة محشية رز ولحمة محمرة ومستوية منيح مع قلوبات على الوج، بتتقدم مع صوص على جنب وكطبق ختامي بس متل ما بقول المتل اللبناني بكون “الختام مسك”.

٣. جبنة راكليت

لأن كتار بفضلوا ليلة الميلاد ما يطبخوا وبيتركوا الأكل الدسم لتاني نهار، رح تلاقوا بيوت كتيرة بتحتفل بليلة العيد على طريقتها الخاصة مع الراكليت المصحوبة بكل أنواع الجبنة والحبش والمارتاديلا والسلامة مع شوية كبيس ومكسرات على جنب.

٤. قراص كبة مشوية

هل أكلة من التراث الميلادي عند أهل الشمال لأنها غنية بالبرغل وعلى مر السنين هل ضيع كانت تستبدل الرز بالبرغل. بقولولها كبة بشحمة بكتير ضيع، هيي عبارة عن قراص كبة مشويين على النار مع حشوة وخلطة خاصة بكل ضيعة. بيتقدموا كطبق رئيسي أو مع المقبلات وأكيد مع صحن لبن على جنب.

٥. بزاق

أكلة البزاق أو الescargots مش الكل مجربها أو بحبها بس بالعادة لي معود عليها ما في إلا ما يعملها كل سنة لأن صارت جزء من تراث الميلاد. هل طبق الكلاسيكي الموسمي بيتنضف منيح وبيتحضر على الأصول وبيتقدم مع صوص على جنب. الفرحة الكبيرة عند العيل بتكون بس يجي الموسم والكل ينزل على لم البزاق من بعد أول شتوية والبعض بيسلقوا وبفرزوا بالتلاجة لوقت المناسبات الكبيرة متل ليلة الميلاد.

٦. كستنا

من بعض ما خبرناكن عن الأكلات الرئيسية لي بتتقدم على عيد الميلاد، هلق رح نخبركن عن الأكلات التانية، المشروب والحلو والقصص لي كتير مشهورة بالعيد، متل الكستنا. محبوبة الجماهير، الولاد والكبار، الكل بينطر الكستنا نهار العيد وخاصةً بس يكونوا مشويين ومحضرين على الستوف. هل ثمرة بدفي ليالي الشتوية ولأن الأوضاع صارت صعبة، الناس صارت تنطر العيد كل سنة لتشوي كستنا ويستمتعوا بليلة العيد.

٧. مغلي

من القصص لي الكل بينطرها من سنة لسنة، المغلي. معروف هل الحلو إنو بيتقدم من بعد ما الكل يخلص أكلو وتقرب تصير الدني نص ليل، بيجي على وجو قلوبات ورشة جوز الهند. الكبار والزغار بحبوا وبضلوا يضيفوا مغلي الأهالي كل فترة العيد مع شوكولا العيد بعد القهوة والليكور.

٨. بوش دو نويل Bûche de Noël

الكل بيعرف أهمية البوش Bûche بفترة الميلاد، هل غاتو بيتقدم خصيصاً ليلة عيد الميلاد من بعد الأكل والشرب. بيجي البوش Bûche على شكل حطبة ليذكرنا بالتراث الميلادي وليالي الشتوية مع كريمة على شوكولا أو فانيلا وهلق صار الكل يتفنن بتحضير البوش، وصار في كتير طعمات جديدة عم تنضاف بس بيبقى حلو البوش الكلاسيكي أكتر شي مطلوب.

٩. نبيد

منوصل على المشروب والكل بيعرف إنو كريسماس ما بيكمل من دون قنينة نبيد أحمر بتدفي القلب وبتخلي الجو يصير رومانسي وحميم بين الأهل والعيل. الكل بينسى العرق والويسكي وبيشرب نبيد وبصيروا الصبايا والشباب يتصوروا مع كاسة النبيد بإيدن.

١٠. الليكور Liqueur

مشروب ميلادي عريق بيتقدم بس بفترة العيد، وهوي عبارة عن starter drink بيتقدم قبل العشا مع ضيافة العيد متل الشوكولا والمغلي أو حتى من بعد القهوة. الشرك اللبنانيي بتتنافس على صناعتو متل قاسطلي شتورا وغيرها، بيجي على عدة طعمات متل القهوة، الكراميل، الفانيلا، الليمون، الفريز والIrish cream وغيرها من الطعمات المميزة. بضل يتقدم هل مشروب مع ضيافة العيد طيلة فترة الزيارات والمعايدات.

تعرفوا كمان على هل أكلات الشعبية من مختلف الضيع اللبنانية.