مرقتوا على سوق الميلاد ببكفيا؟ (الدخول مجاني)

شو عاملين هل جمعة؟ إذا ما عندكن شي، حملوا حالكن وعملوا مشوار على بكفيا لأن ناطرتكن مفاجآت كتيرة. هل ضيعة الحلوة محضرتلكن مهرجان ميلادي كتير مهضوم.

بس توصلوا على الضيعة، بتصفوا سيارتكن وبتنزلوا على سوق الميلاد بساحة الضيعة وأكيد الدخول مجاني.

رح تلاقوا ستاندات أكل وحلو وزينة وألعاب وأكسسوارات وهدايا ومونة وقصص كتير مهضومة. بتبرموا، بتتفرجوا، بتحسوا بجو العيد وبتجيبوا كل شي بيخطر على بالكن.

جوعانين؟ بتجيبوا أكلكن وبتروحوا توقفوا حد النار بنص الساحة وبتستمتعوا بجو العيد.

مش بس هيك، كل يوم في نشاط شكل مع موسيقى وجو حلو لتنبسطوا مع العيلة ولتغيروا جو مع أصحابكن. والولاد رح يكون كمان إلن حصة كبيرة من عروض وأغاني وموسيقى.

تم افتتاح القرية والسوق الميلادي الويك-أند لي مرق، وأكيد بعد فيكن تلحقوا هل جمعة كمان لتستمعوا بجو العيد. رح يستمر السوق لنهار الجمعة 23 كانون الأول وبيفتح يومياً من الساعة 5 بعد الضهر للساعة 10 بالليل.

شوفوا كمان، مهرجان عيد الميلاد بضيعة القبيات هل أسبوع.