بروفانسال: فندق الأحلام وجار السما بإهدن

بس نجيب سيرة إهدن ببلش القلب يدق ومنحس بالعاطفة القوية لهل مكان. صراحة هل ضيعة فعلاً إسم على مسما، “إهدن” هي جنة “عدن” ومين ما بروح عليها بيشعر بهل شي.

الجو بإهدن بالشتوية حول كتير ويمكن أحلى من الصيفية، الشوارع مزينة بالميلاد والقرميد الأحمر بيتغطى بالتلج وساحة الميدان الأثرية بتعج بالمطاعم والفنادق والقعدات الجبلية الرايقة لي رح تذكركن بلبنان الزمن الجميل.

ولتكمل معكن، بس تنزلوا على الميدان رح تستطعموا بأطيب كاسة سحلب وتدفوا بطنكن وتتأملوا الرايح والجايي. وبنص ساحة الميدان، بتبرموا بتلاقوا أوتيل حجر، حلو كتير بيشبه القصور التراثية بكل تفاصيلو وبنفس الوقت بحسسكن بدفا وحنية بيوت الضيعة العتيقة، هيدا أوتيل بروفانسال.

من خلالو بتسافروا بالزمن، بترجعوا علبنان الزمن الجميل، إيام ما كنت الإشيا حلوة كتير تمشي على الهدا الهدا وبرواق. ومش غريب تشعروا بهل شعور بس توصلوا على هل أويتل لأن هوي فعلاً متل الحلم لي بريحكن من هموم الحياة ولو للحظات.

تأسس هل أوتيل سنة 1927 وهوي عبارة عن بيت حجر بيتألف من عدة غرف دافية ومكنكنة. بيتمتع أوتيل بروفانسال بديكور بسيط بس قريب للقلب، كل الغرف مجهزة بكافة وسايل الراحة.

من فوق على التراس فيكن تتأملوا أحلى منظر لإهدن. وشو يعني رومانسية بدون قعدة دافية على الشوميني متل هيدي؟

بتمشوا بأوض الأوتيل بتشعروا حالكن بشي متحف عتيق عم تتأملوا الفن والجمال وترتاحوا نفسياً.

بلشت تتلج بإهدن، فحتكون أحلى قعده بهل أوتيل بدفى الموقد إنتو وعم تشوفوا التلج المغطى كل شي. ما في أجمل من هل شعور… يمكن ما رح نلاقي الحكي لي بعبر عن جمال هل مكان والضيعة لي رح يسحركن.

النومة رح تكون متل ما إنتو بتحلموا، تخت مريح، دفا وشوميني، تراس مطل على ساحة إهدن ورومانسية على الآخر بتذكرنا بغنية سلوى القطريب “خدني معك على درب بعيدة” لأن فعلاً هل أوتيل رح ياخدكن على درب بعيدة.

لبنة، جبنه، مع زيتون وخبز، وشاي الأسود عم يغلي أو فنجان قهوة مع شوية بيض. رح تاكلوا الترويقة اللبنانية اللذيذة بهيدا الأوتيل يلي بينبض بالجو الحلو والدافي. ما بتكمل القعدة من دون كاسة سحلب سخنة مع رشة قرفة وشوية حب وأغاني فيروز.

فيكن تقضوا النهار بالأوتيل عم تستمتعوا بكل زاوية وبكل لحظة وبكل شي قبالكن أو فيكن تتأملوا جمال إهدن من خلال القعدة على التراس أو التمشاية قدام الأوتيل لي رح تردلكن الروح.

ضيعة إهدن حلوة كتير بالشتا وشوارعها بتنبض بالحياة والمطاعم والآثار. ما حيسوعكن قلبكن من الفرحة والحماس بكل شي رح تكتشفوا بالمنطقة.

بالرجعة على الأوتيل، بتجربوا الأكل الطيب بجو دافي وخيالي ما رح تلاقوا متلو، لأن الدفا والحب هني أكتر شي إنتو بحاجة لإلو.

الأهم إنو الأسعار بتبلش ب120$ بالليلة، فإذا كنتوا قادرين تدفعوا هل مبلغ أو عبالكن تجمعوا مصاري وتصرفوهن على عطلة مرتبة، ما تترددوا تحجزوا لأن ما رح تندموا ولا شوي.

يلا على إهدن لتعيشوا تجربة من العمر… هل أوتيل رح يشعركن إنكن بشي ضيعة بعيدة كتير ما حدا بيعرف فيها، عم تحققوا أحلامكن وتستمتعوا بالحياة.

لتعرفوا أكتر عن هل أويتل أو لتحجزوا اتصلوا على الرقم التالي: 040 561 06

إذا بدكن تعرفوا شو في مطاعم بإهدن شوفوا معنا ١٤ مطعم بإهدن مع قعدة بطير العقل.