ليستات

١٨ شغلة بيفهمها اللبناني اللي قاعد بالضيعة

في أحلى من القعدة بالضيعة؟ تعودنا من زغرنا نتعلق ببلدنا لبنان، تعلقنا بأرضو وترابو وجبلو وبحرو وسهلو وكل شي حلو في، ورح نرجع اليوم على جذورنا لنتذكر تراثنا الغني وذكرياتنا الحلوة بالضيع اللبنانية، شوفوا معنا كم شغلة اللبناني القاعد بالضيعة بيعرفها منيح!

1 – أطيب مناقيش هي مناقيش فرن الضيعة

وما مننسى أديه ترويقة الضيعة البسيطة قريبة على القلب

2- موسم تحويش الزيتون مش بس للقطاف

بس كمان للعيلة كلها تنبسط وتجتمع وتساعد بعضها وكلنا عنا ذكريات روعة لهل وقت من السنة

3- ما في أحلى من بيت التيتا والجدو بالضيعة

بونسوكن بتفاصيل حياتن البسيطة بساندويش لبنة وزعتر، بعلموكن كم شغلة عن الزرع والأرض وعن تاريخ البلد كلو، وبيرولكن قصص قديمة على زمانن. أكلات التيتا أطيب شي بتاكلوا بحياتكن وخاصةً طبخات الضيعة: كبة بلبن، قمحية، فريكة، كوسا بلبن، كشك، محشي ملفوف وورق عريش على لحمة.

4- هالمنظر كل يوم منشوفوا

ومنوقف السيارة بس ليمرقوا

5- الكل بدن ياكن تتجوزوا حدن من الضيعة

هيك بتعمروا بيت هونيك وبتقضوا حياتكن كلها بالضيعة

6- ما بتكمل الشتوية بدون قعدة الصوبا

وأكيد ما مننسى البطاطا الحلوة والكستنا والدرة وساندويش اللبنة اللي منعملن عليها

7- ما بتطيقوا النزلة على بيروت

وجو المدينة وعلقة العجقة مصيبة، ما فيكن تتحملوا تبعدوا عن الضيعة أكتر من نهار!

8- ما بتاكلوا همّ المونة أبداً

كل سطوح البيوت شكلها هيك بالموسم

9- الجرصة بتصير جرصتين إذا عرفوا أهل الضيعة بخباركن

وبتعرفوا كل أخبار الضيعة على الصبحية مع الجيران

10- بتحبوا حكيكن الضيعوجي أد الدني

ولما حدا يحزر انتو من وين بتكيفوا!

11- كل البيوت مزينة بالعريشة اللي بتعطيها جمال خاص

12- أحلى ذكريات كانت إنتو وعم تفقوا بزر على البلكون وعم تتخانقوا مع أصحابكن على لعبة روق

وكنتوا تطوشوا الحي كلو على صوت الصريخ والمقاتلة

13- تلت رباع الضيعة عندن نفس اسم عيلتكن

وكذا واحد بكونو عندو نفس الاسم الزغير واسم البي ووقتها بتضيع الطاسة، ومش بعيدة تكون كل الضيعة بتقربكن من مدري أي جد، فبتنعزموا على كل الأفراح وبتعملوا الواجبات بالعزا

14- عطول فيه مزارع بالضيعة عندو حمار بيركب عليه من أول الضو

15- ولا مرة طلع الديليفري تبع بيروت بوصل لعندكن

وبتحسوا حالكن قاعدين بأرض مقطوعة

16- الشرب من البريق فن بحد ذاتو

كل الضيعة بتتقنوا من الكبير للزغير