شوفوا هل أكلات الشعبية لي بس أهل الشمال بيعرفوها

كل منطقة من مناطق لبنان بتشتهر بأكلات شعبية ولذيذة أما الشمال موضوع تاني، فهني مشهورين بالأكلات النباتية الغنية بالبرغل وبخبز التنور والأكلات الشعبية البسيطة، رح نخبركن عن بعض هل أكلات يلي بحياتكن مش سامعين فيها.

١. جرماش

هل أكلة العكارية كانت مشهورة كتير بالزمانات، عبارة عن برغل ناعم وطحين ونعنع مع حشوة بصل ورمان ودبس الرمان وحامض وملح. هل أكلة بتنعمل على أصولها على حطب التنور بس لأن مش الكل عندو تنور، صارت تنعمل على منقل الشوي وبعدن بعض الضيع العكارية بيعملوها لليوم.

٢. سلق بلوبية (المرشومة)

عبارة عن أكلة نباتية كانوا من زمان الناس لي مش قادرين ياكلوا لحمة يلجأو لإلها، بتقطعوا السلق عن الضلوع لتسلقوا ويستوي منيح وأما الضلع فبيبقى قاسي، بيرجع بينفرم السلق وبينحط بالطنجرة ليغلي وينسلق منيح. بس ينسلق منيح بيتصفى وبيندلق فوقن لوبية مع زيت وكزبرة وهيك بتطلع الأكلة بتشهي على الآخر.

٣. فول أخضر (حبوب)

هل أكلة مكوناتها بسيطة بس طعمتها حرزانة. عبارة عن حبوب فول أخضر مسلوقة ومتبلة مع توم ونعنع، كتير طيبة لأنها أكلة شهية، وسريعة وتعتبر أفضل وجبة غذا وبتكفي للنهار كلو.

٤. سلطة زعتر بري (زوبع)

هيدا الطبق لي توارث من جيل لجيل بيتألف من الزعتر البري أو الزوبع، البندورة، والبصل، المخفوقين منيح بزيت الزيتون والحامض، في ناس بتحب تزدلن دبس الرمان على الوج- هل أكلة بتتميز بلونها الأخضر الشهي.

٥. تبولة كذابة

تعتبر من الأطباق التراثية التقليدية والشعبية بالشمال، بتشبه التبولة بس فيها برغل أكتر من التبولة، بينزدلها حبات بندورة وخيار وبصل أخضر مخفوقين منيح مع رب البندورة والحامض.

٦. خبز التنور

من زمان كانت تفوح ريحة خبز التنور بالحارات وكانت الناس تركض من الصبح لتاكل طلامي وتغطس قطعة الخبزة باللبنة أو والزعتر وبهل شي معروفة ضيعة القبيات وعندقت أكتر شي لأن بيعملوا خبز تنور بشهي وكمان مناقيش تنور بيقصدوهن الناس من بعيد- فيكن بس تجوا تاخدوا ربطة خبز على التنور معكن على بيروت.

٧. طبيخ

القبياتيي عندن أكلة معروفة كتير إسمها “طبيخ” ومش متل ما البعض بفكروا إنو طبيخ يعني طبخة عادية، لاء. طبيخ عبارة عن أكلة بقولوا جايي من العثمانيي وإسمها “قاش” بالتركي وبيعني طبيخ، معمولة من لبن مطبوخ وقمح.

شوفوا كمان، صفوان الأصلي: ملك الصفيحة البعلبكية ببيروت.