٣ مطاعم لبنانية على لائحة أفضل مطاعم بالشرق الأوسط وشمال أفريقيا

فقنا اليوم الصبح على خبرية كتير حلوة خلتنا نشعر بالفخر! تم نشر القائمة السنوية لأفضل 50 مطعم لمنطقة الشرق الأوسط وشمال إفريقيا (MENA)، وورد على هالليستا ثلاث مطاعم لبنانية على الرغم من كل الظروف الصعبة لي عاشها لبنان بالسنوات الأخيرة.

المطاعم من ضمن القطاعات يلي شهدت صعوبات هالكم سنة، لي عانت بشدة من انقطاع دايم بالكهربا ومن التسكير المتواتر بسبب كورونا وعدم ثبات سعر صرف الليرة وغيرها من التحديات يلي ما وقفت هل قطاع من البقاء ولا حتى من التطور.

واليوم رغم كل شي عم ترجع هل المطاعم اللبنانية ترفع إسم لبنان بالعالي مرة جديدة! شهدت القائمة لي احتلت المرتبة الأولى فيها دبي من خلال مطعم أورفالي بروس بيسترو والكويت المرتبة 50 من خلال مطعم بونجيري، وجود تلات مطاعم لبنانية على الليستا الدهبية، خلونا نشوف سوا مين هل مطاعم وبشو بيتميز كل محل.

بالمرتبة رقم 20: Em Sherif إم الشريف

احتل إم الشريف المرتبة رقم 20 بين المطاعم اللبنانية على الليستا، وهوي مطعم لبناني أصيل بقدم تجربة الطعام اللبنانية المثالية وبوفر للضيوف اللقمة اللبنانية التقليدية بشكل محترف وإستثنائي. الأكل الطيب بكتملوا القعدة التراثية والديكور لي بيحبس الأنفاس مع الأطباق المزخرفة لي بتاخد الزوار على رحلة استثنائية من حكايات ألف ليلة وليلة.

بالمرتبة رقم 19: Tawlet Mar Mikhael طاولة مار مخايل

فرع لسلسلة مطاعم “طاولة” النموذجية المتخصصة بالسفرة اللبنانية. كل يوم، بيجوا طباخين موهوبين من منطقة لبنانية مختلفة بيحكوا قصة طبخة اليوم بهدف إعادة إحياء المأكولات التقليدية القديمة عبر تحضير مجموعة من الأطباق الشهية والمشهورة بمختلف مناطق لبنان، وبسّوق هل مطعم كمان لمنتجات المزارعين المحلية. هوي كمان مساحة متاحة للمشاركة بالأحدايث الحلوة ولإقامة صداقات والتعارف وتبادل الأفكار حول طاولة كريمة ولقمة طيبة.

أخيرًا وليس آخراً، بالمرتبة رقم 16: Baron بارون

يعتبر بارون أفضل مطعم بلبنان بالتصنيف العالمي! هل مطعم المليان فرح وحيوية مخبى بشوارع مار مخايل وبقدم مينو بلدي متنوع، معروف بالأطباق الفريدة لي تعد بمثابة تكريم للنكهات التراثية لي بتنعمل بطريقة مبتكرة – كل شي بقدمه مع لمسة سحرية. أطباق بارون غنية بطعمات البحر المتوسط واليابان وبتخلي الزوار يكتشفوا نكهات جديدة وغنية من خلال مجموعة من الأطباق المنسقة بخبرة!

بما إنو الأكل الطيب وفن التقديم والديكور وحسن الضيافة هني من مميزات المرافق السياحية بلبنان، بيسعدنا نشوف تلات مطاعم لبنانية على لائحة أفضل مطاعم بالشرق الأوسط وشمال أفريقيا، ومنتمنى إنو يضل نجم المطاعم اللبنانية يلمع رغم كل الظروف الصعبة.

إذا عبالكن تشوفوا ليستة السنة الماضية، اكبسوا هون.