تعرفوا معنا على أقدم المطاعم الشعبية المحبوبة ببيروت

خلال السنين فتحت مطاعم كتير بالعاصمة وصار فينا نجرب أغلب الأكلات والأطباق ببيروت، بس بتبقى المطاعم البيروتية القديمة محبوبة بالساحة الشعبية، الأكل فيها طعمو غير، قريب للقلب ومعمول بكل حب وبكل كدشة منحس حالنا أقرب لتراثنا اللبناني الغني، هالمطاعم العريقة عندن زبوناتن اللي ما بياكلو الا من عندن، شهرتن الخاصة، ولقمتن المميزة، تعو نتعرف على أشهر مطاعم بيروت الشعبية القديمة.

1- مطعم السوسي – مار الياس

هالمطعم الأصيل فاتح من 1930 تقريباً، وصنّفت ترويقة مطعم السوسي أفضل فطور بالعالم من بين 100 وجبة ترويقة بالعالم سنة 2013، هوي مطعم بيروتي شعبي بقدم أطيب ترويقة حمص وفول، فتة وقورما، سودة وبيض ونخعات وكل الأكلات اللبنانية الشعبية.

الرقم: 145 312 01

2- فرن أشخانيان – زقاق البلاط

فرن أرمني صرلو فاتح من سنة 1946 ببيروت، بيقدم المانتي الأرمني مع الحر، واللحم بعجين عندو مع رب الرمان طعمتو خيالية.

الرقم: 178 375 01

3- نمر الوادي – الضاحية

هل محل الحلو المشهور انفتح بسنة 1994، الكنافة عند حلويات نمر الوادي عنجد بينحكى فيها، منظر وريحة بدوبو القلب!

الرقم: 030 573 71 – 802 904 03

4- مطعم أبو حسّان – برج حمود

مطعم أبو حسّان المشهور بلقمته الطيبه صرلو أكتر من 70 سنة بيقدم أطيب صحن فول وحمص، هيدا عدا عن المجدرة الحمرا عندو أديه طيبة.

الرقم: 888 266 01

5- ملك البطاطا – الحمرا

إذا عبالكن ساندويش بطاطا ببيروت، ما إلكن غير مطعم ملك البطاطا بالحمرا، صرلو فاتح بالمنطقة من سنة 1969 والعالم بتجي لعندو من آخر الدنيا لتجرّب ساندويشاتو.

الرقم: 722 347 01

6- فلافل أبو نبيل – المزرعة

فلافل أبو نبيل غنية عن التعريف، هالمطعم العريق صرلو من سنة 1958 فاتح ببيروت وبيقدم الفلافل بكل حب وبساطة وقريبة على القلب، بتحسّوا حالكن بالبيت عندو!

الرقم: 816 318 01

7- مطعم بربر – الحمرا، سبيرز

من أشهر المطاعم الشعبية الموجودة بالحمرا من سنة ال1979 وحالياً فاتح فروع مختلفة ببيروت وحول العالم العربي، بيشتهر بتقديم أطباق الشاورما والكباب وحتى بتقديم المعجنات، وكمان بتقديم أطباق لبنانية شهية متل الفتوش والتبولة ،الورق العنب والحمص والمشاوي.

الرقم: 855 433 03 – 866 433 03

8- مطعم أبو عفيف – الحمرا، الدكوانة

مطعم أبو عفيف طالع صيتو بكل بيروت، صرلوا من 1988 بيقدم أطيب ساندويشات لحمة ودجاج ومشاوي بالمنطقة.

الرقم: 444 235 03 – 912 332 81

9- العنتبلي – الحمرا

العنتبلي محل للبوظة العربية صرلو من سنة 1936، وكمان بيقدم جميع أنواع العصائر والكوكتيل والبوظة الإيطالية والكاتو، بتلاقوا عندو أطيب بوظة عربية على قشطة ببيروت!

الرقم: 326 739 01

10- Bella Napoli Pizzeria – الروشة

هالمطعم بيقدم اللقمة الإيطالية ببيروت من سنة ال 1963، مشهور بال Napolitana بيتزا، بيعملها على الحطب وعلى أصولها!

الرقم: 950 814 01

شوفوا كمان، ٤ محلات فيكن تطلبوا منن ساندوتشات دجاج غير شكل.