أطيب مطاعم الجنوب لتجربوا لحمة نية غير شكل

الكبة والفراكة واللحمة النية من المأكولات اللبنانية التراثية اللي ما بتطلع طيبة إلا من إيدين معلّمينها! إطلعنا اليوم على الجنوب الحبيب، عملنا فتلة زغيرة بالمنطقة وجبنالكن أطيب مطاعم الجنوب لتجربوا لحمة نية غير شكل.

1- مطعم ورد – أنصار، النبطية

مطعم ورد معروف بالمشاوي المشكلة والمازة الشهية، بس عندو اللحمة النية مع تحويشة الكبة الجنوبية وكدشة بصل ونعنع غير عالم!

الرقم: 200 572 70

2- مطعم الشالوف – جزين

مطعم الشالوف معلق بالسما جنب شلالات جزين، بيقدم سفرة غنية ومغنّجة بكل الأكلات اللبنانية التراثية وبيفتخر بتقديم مختلف أنواع اللحمة النية بكل إمتياز، بتاكلوا على جنبها جاط تبولة بجنن وحمّص كتير طيب.

الرقم: 774 781 70

3- مطعم المختار – جنسنايا، صيدا

مطعم المختار بيقدم كميات محرزة وكريمة بالأكل بكل فن وإحترافية، من ورق العنب والحمص باللحمة واامقانق بالفخارة للكبة مع كرز والفتايل مع دبس الرمان، وأكيد ما بتكمل السفرة من دون اللحمة النية والكبة النية والسودة مع الفلفل والخضرة ورشة بهارات غير شكل.

الرقم: 755 434 03

4- Les Caves Roum – جزين

اجتمعوا على الأجواء التراثية واللقمة اللبنانية والجو الدافي بمطعم الكهف بجزين، عندو اللحمة النية معمولة على أصولها وبكل كرم، مع بهارات وخضرا ورشة زيت زيتون، يا عيني!

الرقم: 292 810 07 – 126 000 76

5- مطعم بيت الزمن الجميل – النبطية

رح تعشقوا الفراكة عند مطعم بيت الزمن الجميل، بيعملها على الطريقة الجنوبية وبيقدمها مع الجوز ودبس الفلفل، بيقدم المطعم كمان سفرة شرقية ومليانة بإمتياز، صحون معرّمة من بطاطا حرّة وورق عنب ورقاقات الجبنة ولحمة النية وكبب وحمص ومتبل مع جو تراثي أصيل مميز.

الرقم: 222 429 71

6- لوس – جزين

بتطلعوا صوب جزين عند لوس وبتنسحروا بالمناظر الطبيعية والنكهات اللبنانية، سفرتو الغنية ولقمتو البيتوتية بتحسسّكن بالدفا، وهيك جو تراثي ما بيكمل من دون اللحمة النية اللي بيعملها، تقديم وطعم بيطير العقل، ضروري تجربوها!

الرقم: 330 780 70

شوفوا كمان، ٥ مطاعم جبلية لازم تزوروها هل شتوية بلبنان.