تعوا نتذكر سوا أشهر وأجمل مسلسلات مروان نجار

اليوم خسر لبنان الأب الروحي للدراما اللبنانية الكاتب والمنتج والسيناريست مروان نجار بعد صراع كبير مع المرض.

رحل مروان نجار وترك إسمو مطبوع بذاكرة الجيل الجديد والقديم عبر العديد من المسلسلات والمسرحيات والأعمال الدرامية لي كتبها وأنتج معظمها وحقق للبنان إسم كبير على صعيد الدراما.

وما فينا ننسى إنو مروان نجار أطلق معظم نجوم لبنان على عالم التمثيل وأكتر شي منتذكر من خلال حلقات مسلسل طالبين القرب متل فيفيان أنطونيوس، باسم مغنية، يورغو شلهوب، إلسي فرنيني، جورج شلهوب، وسام صباغ، كارمن لبس، بديع أبو شقرا، كارول حاج وغيرن من ألمع نجوم الفن والتمثيل بلبنان يلي صاروا وج لبنان الحلو لي ما منحب نتذكر غيرو.

احتراماً لروحو الطيبة ولمسيرتو المكللة بالنجاح والفن والإبداع حبينا نتذكر اليوم أبرز الأعمال الفنية يلي قدمها مع غصة وحرقة قلب ومنتمنى روحو تكون بالسما.

١. مسلسل طالبين القرب الجزء الأول

مسلسل ربينا علي، تم عرضو عام 1997 لأول مرة، وبسبب نجاح الكبير بس حققو وصل عدد حلقاتو لأكتر من 100 حلقة ورجع انعمل جزء تاني منو. بتحكي أحداث المسلسل عن قصص حب وجازة وارتباط وطلاق وغيرها من المواضيع الإجتماعية بين شباب المجتمع اللبناني بوقتها. كان يعرض هل مسلسل قصص قصيرة بكل حلقة ومشاهد سريعة لعلاقات عاطفية مختلفة. أكيد غنية المسلسل بقيت علقانة براسكن، والغريب إنو أغلب الممثلين المعروفين اليوم كانوت بوقتها أبطال طالبين القرب وكان هيدا المسلسل سبب شهرتن الواسعة متل باسم مغنية ويورغو شلهوب وكارول حاج وفيفيان أنطونيوس.

جنريك المسلسل:

٢. مسلسل ديالا

هل مسلسل من أهم وأشهر المسلسلات لي انعرضت على تلفزيون لبنان، بطولة هند أبي لمع، أحمد الزين، انطوان كرباج وابراهيم مرعشلي وقصة سيناريو وحوار مروان نجار. بتحكي القصة عن صبية إسمها ديالا بنت حلوة كتير هربانة من عيلتها لي عندها سجل إجرامي كبير فبتوصل على ضيعة وبتطلب وظيفة من صاحب أرض فبيتجوزها صاحب المزرعة وبتصير تقضي وقت مع إبن خيو بسبب غيابو عن البيت وسرعان ما بتلش أصابع الإتهام تتهمها بخيانة جوزا وبتبلش المعاناة الحقيقية.

جنريك المسلسل:

٣. مسلسل من أحلى بيوت راس بيروت

من أكتر المسلسلات اللبنانية شهرة بسنة 2001 ومن أشهر تيترات المسلسلات اللبنانية. مين منا مش حافظ غنية المسلسل عن غايب بعدو؟ بتدور حلقات المسلسل حول العديد من المشاكل المتعلقة بفترة المراهقة وعن إهمال الأهل لولادن بهل المرحلة المهمة من عمرن وبتصير الأحداث بقلب بيت تراثي لبناني موجودة براس بيروت بيستقبل هل شباب وبأمنلن الحنان والأمان لي عم ينبشوا علي من خلال الإم وصاحبة البيت لي بضل تهتم بكل حدا فين. هل مسلسل بصور يومياً مغامرات شباب الجامعات والكليات لي عم يكتشفوا حالن من جديد وينغرموا لأول مرة.

جنريك المسلسل:

٤. مسلسل طالبين القرب الجزء التاني

الجزء التاني من المسلسل بيتميز بالقصص الحلوة والمهضومة والشيقة مع نفحة رومانسية وكوميدية وحتى في ظهور مميز للفنانة كارول سماحة بقلب هل حلقات ويلي شاركت بأداء الشارة بشكل إبداعي وأكيد لازم نرجع تتذكرها سوا.

جنريك المسلسل:

٥. مسلسل بنت الحي

بتتذكروا ميرا البنت الشقرا الطيوبة لي كانت إمها ما بتحبها وتعذبها كتير؟ كم مرة حاضرين هل مسلسل؟ كلنا منتذكر هل مسلسل الحلو لي فات على قلوبنا وخلانا ننطروا مناطرة ونقعد نحضروا ونشوف الأحداث المتتالية، بتدور قصة المسلسل حول بنت زغيرة عايشي بحي قديم، أمها قاسية وبالها بحالا وبس عطول، عم تدفع بنتها تمن كرها لجوزا وبتصير ميرا حاسي بالذنب بسبب تحميل إمها الذنب بهل زواج وبسبب عيش الزوج صراع دايم من ورا ضعف شخصيتو تجاه مرتو وخوفو على بنتو.

جنريك المسلسل:

٦. مسلسل الطاغية

بطولة ميشال تابت، طلال الجردي، طارق السويد، كمال الحلو ورنده كعدي، بيحكي عن الصراع على للمصاري والنفوذ والقوة لي بتمثلن شخصية الطاغية لي معذب الكل وبيقمع ولادو ومرتو وكل الناس لي حوالي. المسلسل بيفضح البطل بعد عدة محاولات وبتصير الفضايح تظهر وحدة ورا التانية لحد ما توقع جريمة كبيرة.

٧. مسلسل مريانا

هل مسلسل بخبر قصة “مريانا”، بنت الضيعة لي بتجي تأمن لقمة عيشها بالمدينة لكن بتتعرض لكتير مشاكل وتعديات. بتظهر البطلة الحلوة كارول حاج بطريقة مميزة بهل مسلسل لي صار حديث الساعة بوقتها والغنية تبعو صارت على كل لسان وقت عرضو وتميز بظهور مميز كمان للنجمة سيرين عبد النور. مريانا، كانت تشتغل خادمة عند عيلة غنية كتير ببيروت لتساعد أهلها بالضيعة، وهيك بلش الصراع بين بنت الضيعة الحريصة على مبادئها وتربيتها وبين ولاد البيت لي بجربوا يتحركشوا فيها على الطالع وعلى النازل، لحد ما بتتعرف بالصدفة على حب حياتها.

جنريك المسلسل:

٨. صارت معي

هل مسلسل قصة وسيناريو وحوار مروان نجار وبطولة حسن حمدان، عمر ميقاتي، منى كريم، ألفيرا يونس، نادين عجرم وماغي بو غصن وبيحكي عن قصص حقيقية بتوجع صارت بالواقع مع شهادات حية لأصحاب العلاقة بالصوت والصورة. بيبقى هل مسلسل ذات نكهة لبنانية من خلال تصيورو مآسي المجتمع اللبناني خلال فترة الحرب الأهلية.

جنريك المسلسل:

٩. لمحة حب

قصة المسلسل بتحكي عن انتقام بديع ابو شقرا من بي فيفيان لأنو حبسو وسبب بموت بيو من ورا الصدمة فبقرر ينتقم لبيو من خلال الزواج من بنتو فيفيان يلي ما كان عارف إنو رح يصير يحبها. غنية المسلسل كتير حلوة ورومانسية وصح ما كان كتير طويل المسلسل بس بقي علقان بأذهان كل حدا حضروا.

جنريك المسلسل:

كلنا منتذكر هل مسلسلات ومنعتبرها أجمل مسلسلات حضرناها!

مروان روحك خالدة ورح ضل بذاكرتنا ووجدانا بكل شي قدمتو لهل بلد!

شوفوا كمان، ٣٧ غنية رومانسية بمناسبة عيد الحب.