تعرفوا على ٣ أوتيلات أثرية عريقة بلبنان

لو الحيطان بتحكي، لو الحجر بيحكي، لو كل شباك بخبرنا مين عاش بقلب هل أويتلات، لو هل مباني الأثرية بتخبرنا ميات وآلاف الأشخاص لي قضوا ليالي هون، المشاهير، المحاربين، الكتاب، الباشوات، الملوك، الرؤسا والحبايب. اليوم رح نخبركن عن ٣ من أجمل الأوتيلات الأثرية الموجودة بلبنان ولي بتستحق نتوقف عند تاريخها!

١. فندق القادري الكبير، زحلة

عام 1913 تم افتتاح فندق القادري الكبير بالقلب النابض لمدينة زحلة، كتير حلو الأوتيل من جوا ومن برا رح يسحركن كمان. يعتبر من الأوتيلات التاريخية الباقية بلبنان ويمكن الأقدم، عاصر الحرب العالمية الأولى والتانية والحرب اللبنانية وشهد على استقلال لبنان وعلى إعلان دولة لبنان الكبير. البعض بقول إنو احتل جمال باشا الجزار الأوتيل إيام الحرب العالمية وحولو لمسكن لإلو ولجيشو، بس بعد الحرب صار مركز للجنود الفرنسيين المهمين. فندق القادري الكبير بيستقبل الزوار أحلى استقبال، وهوي عبارة عن بيت حجر أثري وقناطر بتطل على أجمل مناظر زحلة من بيوت أثرية والجبال على مد عينكن والنظر. يلي مش رايح على زحلة بحياتو، رح يكتشف جمال وتراث المنطقة من خلال هل أويتل!

الرقم: 038 800 08

٣. فندق بالميرا، بعلبك

من وقت تأسيسو بسنة 1874، ما سكر فندق بالميرا أبوابو ولا مرة حتى بوقت الحرب الأهلية!

هيدا الفندق المميز موجود بمدينة الشمس بعلبك بوج القلعة. مرق علي شخصيات تاريخية وفنية عريقة متل الجنرال ديغول، شاه إيران، فيروز، صباح وغيرن كتير. حافظ على طابعو التراثي وعلى ديكورو العريق وعلى الحيطان والفرش الفخم. فيكن تقرروا ترجعوا تعيشوا تاريخ لبنان القديم من أول وجديد وتقضوا ليلة حلم بغرفة بقلب هل أوتيل، جار القلعة وقطعة من التاريخ اللبناني وتستمتعوا بالأكل التراثي وتزوروا بعلبك ومعالمها التراثية والسياحية.

الرقم: 127 371 03

٣. فندق غراند أوتيل Grand Hotel، صوفر

تم افتتاح هل أوتيل سنة 1892، وكان مركز للرفاهية ونقطة جذب الأغنيا والأمرا والوجوه المعروفة بوقتها، تم اختيار تصميمو على الطراز الإيطالي الفخم. غرفو الساحرة بتاخدكن على رحلة على الماضي وبتنقلكن لوقت ما كان الفندق حافل بالزوار والحياة الفاخرة، بيحوي خمس طوابق، والطابق الأخير مخصص للغرف الملوكية. أما الطوابق الأربعة التانية، بتضم حوالي 100 غرفة مزينة بمحفورات على حيطانها وجدرانها، وبتلاقوا كمان منحوتات وتماثيل بتزين الفندق والممرات بين الأوض. هل أوتيل فعلاً قطعة من الزمن الجميل وكان محطة مهمة بتاريخ المنطقة ويعتبر تحفة فنية يجب المحافظة عليها. صح غراند أوتيل ما عم يستقبل زوار بس فيكن تستأجروا لتحتفلوا في بمناسباتكن السعيدة، عندو venue مميزة وراقية كتير مناسبة لتاخدوا أجمل صور.

الرقم: 720 218 01

شوفوا كمان، ٥ محلات جديدة لازم تزوروها بلبنان هل ويك-أند.