تعرفوا معنا على أشهر أنواع الكبة اللبنانية

كلنا منجتمع على أكلة الكبة بلبنان ومنعتبرها أطيب أكلة تراثية على الطاولة اللبنانية. وأكيد ما في أطيب من الكبة بكل أشكالها وألوانها مع كاسة لبن وخيار ورشة نعنع. شي بياخد العقل! لهيك اليوم رح نخبركن عن أشهر أنواع الكبة اللبنانية من شمال لبنان لجنوبو، وأكيد مع طريقة تقديم كل صنف لتحبوا الكبة أكتر وأكتر.

١. كبة مشوية

بتتحضر على المنقل على شكل قرص مدور محشي لحمة، مشوي على الفحم أو حتى بالفرن، فيكن تحشوا الأقراص صنوبر أو جوز وسمنة كمان.

٢. كبة لقطين

أكلة بيعملوها أكتر شي أهل الضيع وبفترة الصيام خاصةً، بتجي على شكل كبة كباب محشية حمص وسبانغ وبصل وتوم وحامض وبهارات ودبس الرمان من دون لحمة، يعني كبة قاطعة.

٣. كبة بالصنية

عبارة عن لحمة مفرومة مع بصل وبهارات محشية جوز وصنوبر ومشوية بالفرن وبتتقدم بالعادة مع جاط لبن وخيار.

٤. كبة راهب

أكلة جبلية بتتاكل أكتر شي بالضيع، محشية عدس وبصل وتوم مع ترانشات سبانغ أو سلق.

٥. كبة مقلية

عبارة عن كبة مليانة حشوة اللحمة المفرومة مع بهارات وصنوبر، معمولة على شكل قراص ومقلية بالنار لتتحمر منيح.

٦.كبة بلبنة

هل نوع كمان كتير طيب وأكتر شي دارج بين المطاعم على طاولات المازة الأحد، عبارة عن كباكيب كبة محشيين لبنة ومقليين على النار.

٧. كبة نية

عبارة عن خلطة برغل ومردكوش مع لحمة الكبة ورشة كمون وبهارات وملح معجونين منيح منيح، وممدودين على صحن مسطح مع زيت زيتون وعنقود نعنع على الوج وأكيد أطيب كاس عرق.

٨. كبة بشحمة

عبارة عن كبة محشية لحمة مفرومة وبصل وصنوبر وجوز وشحمة مدقوقة مع نعنع وبهارات، أكتر شي معروفين فيها أهل الشمال والزغرتاويي بالتحديد.

٩. كبة بطاطا

عبارة عن كبة محشية لحمة مفرومة وبصل مع خلطة برغل وبطاطا مسلوقة وبهارات وكمون وببتاكل بأغلب الأحيان نية! وكل بيت بيتفنن فيها بطريقة مختلفة!

شو أطيب نوع كبة عندكن؟ وشو أكتر نوع كبة مشهورة بضيعتكن؟

شوفوا كمان، أطيب ٥ محلات كبة ببيروت.