١٠ أشخاص بيجلطو عال واتساب

بأي محادثة عالواتساب بين اللبنانيّة لازم يكون واحد بيزعج التاني بتصرّف معين أو بالأحرى بجبلو الجلطة. وطبعا قدّ محكيتو وعاتبتو.. ما في شي بيتغير.

١. اللي بردّ عالرسالة كل ٥ ساعات وانت بالمقابل بتردّ عليه بنفس الثانية.

٢. الشخص اللي بيبعت اسمك وبيختفي .. وهيدا بوقّف القلب! لأن أكيد بوقتها أفكارك حتاخدك وتجيبك انّو في مصيبة عالطريق.

٣. وقت يدق تلفونك ١٥ مسج واتساب .. وتلاقي حدا باعت كل حرف ب رسالة. وهيدا أكيد بدو شنق.

٤. لما حدا يفتح المسج وتمرق ساعات وما يردّ.. وهون ببلش الندم انّك حكيتو من الأساس.

٥. وما فينا ننسى الشخص اللي شايل ال blue ticks، وما بخلّيك تعرف اذا شاف الرسالة أو لا.

٦. أمّا الاستفزاز الكبير هوي الشخص اللي بتبعتلو جريدة وبرد ب .Emoji

٧. الشخص المهووس عال GIFS وال .stickers

٨. الكارثة البشرية الشخص اللي بيبعتvoice note دقيقتين وطلوع. وما فيك ما تسمع لأن أكيد الموضوع مصيري.

٩. الشخص اللي قد ما كنت صحبة معو، بس وقت يزعل بيفقعك Block وبدّك تترجاه ساعة ليرجع يشيلو.

١٠. وأخيرا، المدمن على ال Delete message ، بقضّيها عم يبعت وبيمحي وانت ما بتكون لحقت تشوفها.. والأصعب لما تسألو عنها ويقلك خلص انسى.. طب ليش بعتها من الأساس؟!

أنت أي واحد من هالأشخاص ؟