منقوشة وبيتزا وكعك عصروني دايت؟!

من اليوم ورايح صار فيكن تاكلوا منقوشة وبيتزا وكعك عصروني إنتو ومريحين راسكن وبلا ما تحسّوا بالذنب لأن أخصائية التغذية رشا فرحات قرّرت إنها تعمل عجينة صحّيّة للمنقوشة وللبيتزا وكعك عصروني صحي!

خلّونا نخبركن شوي كيف طلعت الفكرة مع رشا. أوّل شي، رشا أخصائية تغذية بتشتغل بعيادتها (The Healthy Habit) بصربا. بيّا لرشا بيشتغل بمصلحة الخبز والأفران من أكتر من 40 سنة، فالعجين كان جزء كبير من حياة عيلتن…وبما إنّو رشا أخصّائية تغذية فمن الطبيعي إنها تتجنّب تاكل من هالقصص كلها لأن بالدايت المتناسق لازم تكون النشويات محدودة. بس رشا كانت أذكى من هيك وقرّرت إنها تدمج شغلها وشغل بيّا تيطلع معن مشروع رشا الصغير واللي هوي “العجينة الصّحيّة” للبيتزا والمنقوشة بسعرات حرارية منخفضة!

عجينة المنقوشة 25 سم فيا بس 136 سعرة حرارية، قليلة الدسم وخالية من السكر وبتشكل مصدر غني بالألياف والمكوّنات هي: طحين قمحة كاملة، مَي، زيت زيتون، خميرة ورشة ملح.

عجينة البيتزا 20 سم فيا بس 179 سعرة حرارية، قليلة الدسم ومصدر جيّد للألياف والمكونات هيي: طحين قمحة كاملة، طحين الشوفان، مي، زيت زيتون، عسل طبيعي (كمية قليلة) خميرة ورشة ملح.

ومن بعد ما نجح مشروع رشا الصغير، قرّرت إنها توسّع وتعمل “الكعكة الصحية” وفيها بس 180 سعرة حرارية، غنية بالألياف، بتحتوي على مزيج من الحبوب اللي هيي مصدر لمضادات الأكسدة والفيتامينات والمعادن والزيوت المفيدة للقلب.

شو ناطرين؟ بلّشوا وصّوا عالواتساب ع هيدا الرقم 76622446 وتابعوا رشا على صفحتها على الإنستغرام لأن عطول عندا نصايح ومعلومات جديدة تقدملنا ياها، وما بتعرفوا شو معقول تخترعلنا من بعد العجينة والكعكة!