أشيا بتصير مع كل تلاميذ الجامعات بجمعة الإنتخابات

كل سنة متل هالوقت ببلشو الطلاب يتحضرو لإنتخابات الجامعة. هالإنتخابات بتكون عبارة عن نموذج صغيرعن الإنتخابات الحقيقية وبتعطي التلاميذ لمحة عن كيف بتصير العملية الإنتخابية.

مع إنو قوانين الإنتخابات الطلابية بتفرق من جامعة لجامعة، بس أنا أكيدة كل حدا منكم مرق بهالمرحلة رح يتذكر هالإشيا:

1. الصف لما بيخلص عمداخل الجامعة

أول ما تفوت عالجامعة، رح تتفاجأ بصف طويل عريض ناطرك ليتأكدو من ID كل تلميذ وليفتشو جزادينكم، يعني إذا عندك صف أو إمتحان بهالفترة مننصحك تجي بكير. وما تفكر تضهر إذا بدك ترجع تفوت عالجامعة لأن كمان رح يصير فيك نفس الشي.

2. أصحاب المرشحين

هالناس مستحيل تقدر تهرب منهم! وين ما كنت بالجامعة رح يلاقوك وبعدين بيقعدو بينصحوك لمين تصوّت.

3. التلفون المفاجئ

إذا اتصل فيك حدا وما عرفت الرقم، ما في داعي تسأل لمين هالرقم لأن أكيد رح يكون حدا من المرشحين عم يدقلك ليقلك لي لازم تنتخبو.

4. عجقة وفوضى بالصفوف

مع إنو كتير بينبعت ايمايلات قبل بوقت عن موضوع الغياب بفترة الإنتخابات، ما تستغرب إذا جيت عالصف ولقيتو نصه فاضي لأن هيدي شغلة عادية بفترة الإنتخابات والكل بيعملها حجة كرمال ما يفوت عالصف.

5. النتائج

أول ما تبين النتائج، الجامعة رح تتحول لمهرجان كبير. فجأة رح تلاقي عدد كبير من الطلاب مجتمعين وعم يغنو ويرقصو عالموسيقى العالية، وهيدا غير الأعلام المعلقة عالسيارات حد الجامعة. ومن بعد ما يحتفل الفريق لربح، بجمعو بعضهم وبيعملو برمة بكل المنطقة وهيك برأيهم بكونو عاشو الإنتخابات الحقيقية.