١٩ شخص أكلوا عند كبابجي، وتركوا الفاتورة للسنيورة

من وحي محاسبة الطبقة الحاكمة الفاسدة بلبنان، ١٩ شخص قرروا إنو يستردوا الأموال المنهوبة، سندويش ورا التانية.

فراحوا عند كبابجي فرع الحمرا، إلي في كتير ناس بتقول إنو ملك فؤاد السنيورة، رئيس حكومة لبنان سابقا ومتهم بإختلاس ١١ مليار دولار من خزينة الدولة. من المهم إنو نوضح إنو ما لقينا شي رسمي بدل على إنو السنيورة بيملك كبابجي، وملكيته منسوبه لشخص إسمه توفيق الخويري وبنك استثماري (Lucid) بكون ابن السنيورة مدير عام فيه.

طاووق، وكفتة، وكباب، تغدوا الصبايا والشباب وفلوا بلا ما يدفعوا الحساب.

تركوا ورقة لصاحب المطعم مكتوب عليها “يا سنيورة يا منشار، خصمهن من ال-١١ مليار” وحملوا حالهن ومشيوا.

حطينالكن الفيديو لتحضروا وتقولوا صحتين للشباب!