أيد بإيد ضد الجوع: مبادرة إنسانية جديدة بلبنان

نظرا للظروف الصعبة اللي عم يمرق فيها الشعب اللبناني، قرّر”بنك الغذاء اللبناني” يقوم بمبادرة خيرية فأطلق حملة “إيد بإيد ضدّ الجوع” ليتعاون الشعب اللبناني مع بعضهن ضد الجوع اللي سببه الفاسدين بلبنان.

لاقوهن بساحة الشهداء ببيروت نهار الجمعة ٦ كانون بين الساعة ١٠الصبح و ٧ المساء، ونهار السبت ٧ كانون بين ١٠ الصبح و١ الظهر. حيتمّ جمع التبرعات من الحبوب الجافة والمعلبات اللي حتتوزّع يوم السبت على اهل عرسال.

هاي الحملة هدفها تمنع يصير مجاعة خاصة بوقت الثورة وعزّها. حتستمرّ كلّ أسبوع لنوقف حدّ بعضنا بالأوضاع الاقتصادية اللي عم يعاني منها لبنان. ونساعد اهلنا المحتاجين بطرابلس، زحلة، صور، والشوف وغيرهن من المناطق اللبنانية.

“بنك الغذاء اللبناني” هو اسم جمعية تأسّست بتموز 2012، وتمّ اطلاقها رسميا ب أيار 2013. وهيدي المبادرة قام فيها بعض الرجال الاعمال اللبنانية الي تأثروا بفكرة شبيهة الها بمصر. الفكرة بالمقابل نالت اعجاب عدد كبير من المؤسسات الدولية فقرّرت تعميمها على كل دول الشرق الاوسط، ولبنان كان واحد من هيدي الدول.

الفكرة الاساسية القضاء على الجوع بكلّ المناطق اللبنانية ومساعدة كلّ لبناني ما قادر يأمّن حاجته من الأكل والغذاء. “بنك الغذاء اللبناني” بيستند عالتبرعات من أصحاب الأيادي والقلوب البيضاء لدعمه ودعم كلّ الاشخاص المحتاجين. كلّ اللي قادر يساعد ولو بشي بسيط ما يتردّد لأنّ كيس الرزّ بيعمل فرق وممكن يفرّح قلب عائلة بأكملها.

ومتل ما معروف اللبناني بكرمه وأخلاقه وايدو البيضا، منقدر نحن كشعب نوقف حدّ بعضنا وصار الوقت لنوقف حدّ بعضنا ونثبت للطبقة السياسية الحاكمة انو نحن لحالنا دولة وقادرين نعمل فرق.