شو معنى أسامي هل-٩ ضيع بالجنوب؟

الجنوب الحبيب غني بكنوز مخباية بضيع زغيرة الها حكاياتها وقصصها، وطبيعة ساحرة من ينابيع وشط بحري وجبال وغابات صنوبر بمناطقو الجبلية والساحلية، عدا عن الآثار التاريخية والعريقة. اليوم حبينا نعرفكن على معنى أسامي هل الضيع الجنوبية الحلوة.

1- البابلية – قضاء صيدا

ضيعة زغيرة بصيدا انشهرت بالشعرا والمزارع الكبيرة والحرف اليديوية الخفيفة، بيرجع أصل تسمية البابلية لأسباب مختلفة، منها بينسبها لتسمية سريانية معناها “بوابة الله”، منن بقولوا إنها منسوبة لمدينة بابل بالعراق، وفي رواية تانية بتقولو انو اسم الضيعة بيرجع لأميرة من بابل وكانت تسمى بالأميرة البابلية، وحتى في رواية قديمة بتنسب سبب التسمية لأميرة قديمة عاشت بالضيعة اسمها “ليّا”، ونادراً ما كانت تفتح باب قصرها أو تضهر حتى! فكل ما انفتح باب القصر، كانت الناس تنادي فتحت “الباب ليّا”، ومع مرور الوقت صارت لفظة “الباب ليّا” تنقال “البابلية”، وتسميت القرية على نسق هالقصة.

2- النميرية – قضاء النبطية

من أجمل الضيع الجنوبية، بيعود اسم “نميرية” لتصغير كلمة “نمر/نمير”، وبتقول القصة انو من زمان كانت البلدة عبارة عن غابة بتسكنها الوحوش وخصوصي النمور، أمّا القصة التانية بترجّع التسمية لغنى المنطقة بالميّ الحلوة.

3- الحلوسية – قضاء صور

تسمية ضيعة الحلوسية بتعني الناس اللي قلبن قوي وكلن شجاعة وبتعود لخوض ناسها حروب عبر التاريخ ومقاومتن للاجتياحات سابقة، وبعدها لهلق محافظة على الطابع القروي والزراعي وأغلب مزروعاتها من الحمضيات والزيتون.

4- الناقورة – قضاء صور

من أجمل بلدات صور وبتتميز بالشط الصخري، الخبرية بتقول انو المنطقة كانت اسمها “الناقولة” بسبب كثرة تنقل سكانها من منطقة للتانية، ومع التداول تحولت كلمة “الناقولة” لكلمة “الناقورة”، والخبرية التانية بتقول انو بترجع تسمية الناقورة ل”النقر” أو “الحفر” المستمر بالمنطقة بسبب إكتشاف مهندس لعين ميّ بسفح الجبل، وسموّها “عين هارون” على اسمو!

5- الميّة وميّة – قضاء صيدا

بتقول الحكاية انو الاسم محرّف من لفظة “مومياء” نسبةً لآثار اكتشفوها بالبلدة، أو تحريف من كلمة “Mayya We mayy” السريانية واللي معناها “ماء وماء” بسبب تواجد ينابيع كتير من الميّ.

6- المشموشة – قضاء جزين

بيعود أصل الإسم لتحريف كلمة السريانية “Mashammshane” اللي بتعني شمامسة وخدام الكنيسة، ومشهورة المنطقة بدير سيدة مشموشة.

7- البرغلية – قضاء صور

بترجع تسمية الضيعة لشخص من عيلة “برغل” وكان بيملك أغلب الأراضي بالبلدة، وعلى التداول تحول الاسم ل”البرغلية”، بتتميز هالضيعة بآثار من عصر الروماني منها بعدو تحت الأرض، وحتى انشهرت من قبل بزراعة النخل!

8- المجادل – قضاء صور

بيقولوا انو أصل الاسم بيرجع لكلمة سريانية «magdle»، ومعناها الأبراج العالية والأماكن المرتفة والمشرفة، وبتشتهر هالضيعة بصورة المزارع والفلاح والثروة الثقافية والتاريخية.

9- كفررمان – قضاء النبطية

بيعود أصل اسم الضيعة لشجرة الرمان، أو للرمان كرمز الإله رمّون (أو رمّانا بالسريانية)، وكان إله العاصفة والبرق والرعد والنبت والخصب، فصارت تسمية كفررمان بمعنى “قرية الرمان، أو قرية الإله رمّون”.

شوفوا كمان، ٢١ متل لبناني مهضوم عن شهر آدار.