صيدا مدينة رمضانية…ما تفوتوا عليكن أجمل ليالي رمضان!

متل كل سنة، مدينة صيدا بتسحر الناس بليالي رمضانية من الأحلام، وشكلو رمضان هالسنة مميز وما بيتفوت بعروس الجنوب! بيقدم Ramadan In Saida ليالي رمضانية ونشاطات متنوعة بتحلّي كل سهراتنا خلال الشهر الفضيل، إنضموا للساحات المليانة والجوامع العامرة بالناس الطيبة والأجواء الرحبة لوقت ممتع هيدا الشهر!

الجمعيات والكشافة والمؤسسات بالمنطقة كلن اجتمعوا بمكان واحد بهدف إحياء الأجواء الرمضانية الحلوة وليجمعوا الناس على القعدة المهضومة، اللقمة الطيبة، العروض المميزة، والسهرات الحلوة.

بيتضمن البرنامج نشاطات متواصلة ،متل معارض فنية وحرفية وعروض مسرحية بأماكن صيداوية تراثية مميزة متل خان الإفرنج والحمام الجديد وساحة صيدا القديمة.

وكمان بيتضمن نشاطات يومية وفعاليات ممتعة، بتمشوا مسيرات من مساجد صيدا لأسواقها، بتنضموا للنشاطات الدينية بالشهر الفضيل، بتستمتعوا بالنشاطات الموسيقية من فرق إنشاد وفرق تجلي صوفي والكورال، بتتعرفوا على تراث صيدا من “ليالي صيدا التراثية”، وبتنبسطوا بالنشاطات القصصية والحكايات مع نادي المطالعة بصيدا، وأكيد بتلاقوا رسم الحنا والدرويش والحكاواتي!

وأكيد ما مننسى الأكل الطيب من إفطارات رمضانية وسحور مميز وحلويات رمضان مع الجمعات الحلوة والقريبة من القلب.

عيشوا الأجواء الرمضانية الساحرة من باحات مضوية ومليانة ناس وعامرة بالفرحة.

شو ناطرين؟ يلا على صيدا!

تابعوا آخر مستجدات البرنامج الرمضاني “صيدا مدينة رمضانية” على حسابن على إنستغرام هون.

من وحي أجواء رمضان، ضويتوا الفوانيس أو بعد؟ أجمل الليالي الرمضانية عند الفانوس!