٣ محلات فيكن تطلبوا منن مناقيش على الصاج ببيروت

لما يكون الموضوع خصو بالمناقيش، أول شي بيخطر عبالنا هوي الصاج. كيف فينا ما نحب الشعور بس ناكل منقوشة على الصاج؟ العجينة الرقيقة والحشوة الطيبة مع خضرا وزيتون ونعنع، والأطراف المحمصة لي بتخلينا ندوب بطعمتا ونتذكر طفولتنا وشو بدنا نحكي عن الطعمات لنحكي، الحكي مش متل الشوفة والشوفة مش متل الطعمة.

ولأن نحنا منعتبر مشاركة المحلات الطيبة، لغة حب، رح نخبركن اليوم عن أطيب محلات بيعملوا مناقيش صاج ببيروت.

١. قصص الصاج Saj Stories، الجميزة

هل محل إسمو بخبر عنو، القعدة عندو كتير مهضومة متل قعدة البيت، دافية ومكنكنة ولذيذة وبتخبر ألف قصة وقصة. بحضروا كل أنواع المناقيش من منتجات الأرض الفريش، بتجربوا عندو الزعتر والجبنة مرتين وتلاتة وكل مرة بس رح بتتفاجأو هونيك أكتر شي بأنواع الطعمات الغريبة، متل منقوشة الطحينة والمربى، الزبدة بسكر، الدبس بطحينة وغيرن كتير. وأكيد ما رح فيكن تقولوا ما شبعتوا بس تخلصوا!

الرقم: 586 566 01

٢. صاج بيروت، الجميزة

بس تتمشوا بشوارع الجميزة، رح يلفتكن محل زغير عم تفوح منو ريحة ولا أطيب من هيك. صاج بيروت بحضر كل أنواع المناقيش والبيتزا والحلو كمان، كلو على الصاج! خلطة الطعمات رح بتحسسكن كأنكن بحلم! دوقوا الطعمات الروعة لي مخترعينا متل البيستو حلوم، منقوشة الصاج النباتية، منقوشة السجق والجبنة، ومنقوشة الرستو صاج المشهورة. غير هيك، الزعتر والكشك عندو جايين من الضيعة ضغري وكل المكونات طازة ودافيين وبحضرن قدامكن. أما العجينة فهيي بلا سكر وبلا خميرة لما تنفخ بالبطن وطعمتها مش دلعة أبداً أبداً، يعني حتى لي عم ينتبه على أكلو مش مطلوب منو يحرم حالو من المنقوشة بس يكون عند هل محل.

الرقم: 937 733 03

٣. كلاسيك صاج، الأشرفية

شعار هل محل “قلل ناس وكتر صاج”، قدي مهضوم؟ هل فرن اللذيذ بحضر كل أنواع المناقيش وكم إختراع على الصاج وبيتفنن بكل منقوشة وبكل المكونات والخلطات على إيدو. وبين كل المناقيش هونيك، ضروري تجربوا اللحم بعجين على الصاج ومنقوشة جبنة العكاوي التشيكية لي رح تشوفوها عم تدوب قدام عيونكن وتدوبوا وراها. هيدا المحل كل مرة رح بفاجئكن بشي بخلط الطعمات، خصوصي بس يخلط الدرة مع السجق ويعمل أطيب بيتزا أو بس يخبز اللبنة البلدية مع خيرات البقاع أو بس يتفنن بمنقوشة الهوت دوغ مع جبنة لي بتخليها تصير شي روعة. ما بتكفيكن منقوشة وحدة؟ جربوا أكتر من طعمة على الواقف! وإذا بدكن بعد، حملوا معكن الطعمات لي عبالكن تجربوها على البيت.

الرقم: 591 561 71

تعرفوا معنا كمان على الحلويات الرمضانية لي مننطرها كل سنة.