١٠ مطاعم تروحوا علين أحد الشعنينة مع العيلة

“اليوم الجمعة وبكرا السبت وبعد بكرا الشعنينة”، إجا العيد وكلنا مننطر هل مناسبة لنطلع مشوار مع العيلة نتغدا بالمطعم ونغير جو. الولاد بيلبسواتياب جديدة “دح” وبيمسكوا شموع والبنات الزغار بيلبسوا فساتين مكشكشة وبطير شعرن والكل بيتصور وبيتشارك هل فرحة على سفرة أكل لبنانية. خلينا نخبركن اليوم عن مطاعم بتحلى فيها القعدة نهار الشعنينة.

١. فينيقيا، جبيل

مطعم لبناني بالسوق العتيق بقدم أكل لبناني على الأصول بالفخارة ولا أطيب من هيك. كل المكونات محضرة بفن حرفية، قبل ما تبلشوا أكل بتعملوا مناقيش زغار على الصاج وبترجعوا بتاكلوا كل الأصناف اللبنانية اللذيذة وبتستمتعوا بالموسيقى والجو الحلو.

الرقم: 444 540 09

٢. لي تزيغان Les Tziganes، ساحل علما

مطعم على البحر رح يسفركن على عالم تاني، بقدم السفرة اللبنانية، المكسيكية، الروسية وأطباق عالمية رح تستمتعوا بكل لقمة منها على أنغام الموسيقى الرايقة. هل قعدة مناسبة لكل العيل لي عبالن يعيشوا شوية حب ويشموا ريحة البحر ويسمعوا صوت المي مع أكل ومشروب لذيذ.

الرقم: 116 799 71

٣. مطعم السائح، الباروك

هل مطعم موجود بقلب غابة الأرز، بقدم سفرة لبنانية غير شكل وفنجان قهوة مع منظر بياخد العقل وسرود عبرود مع مشاوي ومازة لبنانية أصيلة ومنظر روعة بطل على محمية الشوف.

الرقم: 587 240 05

٤. باب الهوا، إهدن

مطعم بياخد العقل قاعد على الجبل، الفيو روعة بتشوفوا منو إهدن كلها من فوق، مطرح ما السما قريبة ومطرح ما فيكن تقعدوا مع العيلة والولاد وتشموا هوا نضيف تاكلوا اكل جبلي وتعيشوا لحظات ما بتنتسى مع أطيب سفرة لبنانية وفنجان قهوة.

الرقم: 047 456 03

٥. قناطر عنايا، عنايا

بتلاقوا قناطر عنايا على طريق مار شربل، يعني بتخلصوا زيارة وبتروحوا عند القناطر، مش بس الأكل طيب وبشهي بس طريقة تقديم الأطباق حلوة ومهضومة وبيستقبلكن على أجمل قعدة. كل لقمة بهل مطعم إلها قصة وكل جمعة في وراها حكاية. المكونات بيتوتية، المناظر ولا أجمل، وفريق العمل كتير حبوب ولطيف: ما بينشبع من كل شي هون وحتى في محل مميز ليلعبوا الولاد.

الرقم: 066 760 09

٦. جلسة ورد، يحشوش

موقع المطعم بين الجبال والوديان يعني بين نسمة الهوا الحلوة والمنظر لي بياخد العقل. كلو خضار وورود، يعني أكتر من هيك رواق وجمال ما في، بقدم مي ورد ومي زهر، شوفوا بس توصلوا رح يضيفوكن شراب الورد كمان. الولاد عندن مساحة يلعبوا ويتسلوا ويقضوا أحلى نهار.

الرقم: 014 273 03

٧. بيوماس Biomass Restaurant، جربتا-البترون

مطعم بيوماس على طريق القديسة رفقا بجرود البترون، مطرح خيالي بأحضان الطبيعة رح ياخدكن على عالم تاني مليان شجر صنوبر ولزاب وخضار وأكل طيب: شجر، مراجيح، طاولات وكراسي خشب، مزرعة، حيوانات، قعدة بالغابة، مشروب وعصير، ورود وأكل كتير طيب ومساحة شرحة للولاد ليلعبوا ويتسلوا ويتحنزقوا!

الرقم: 532 532 03

٨. باب المينا، جبيل

مطعم تراثي على مينا جبيل بطل على أجمل منظر وبيتمتع بقعدة غير شكل وبيعمل ألذ المأكولات البحرية، هل مطعم جار القلعة وبنام على كتف المينا الأثرية ليمنحكن تجربة استثنائية. لازم ولادكن يتعرفوا على جمال جبيل ويشوفوا كل جزء من هل مدينة الأسطورية.

الرقم: 475 540 09

٩. لوس، جزين

القعدة بهل مطعم بترد الروح بأحضان الطبيعة مع إطلالة ساحرة على غابة بكاسين وأكل طيب وفنجان قهوة وأشهى أنواع الحلو. أكيد الولاد رح يكيفوا كمان لأن عندن مطرح خاص فيهن ليلعبوا ويتسلوا ويقضوا نهار من العمر.

الرقم: 330 780 07

١٠. جنة الشعرا، حراجل

اكتشفوا هالجنة القاعدة على المي الجارية. هل مطعم تراثي بكل معنى الكلمة، فيو كل شي حلو بتلاقوا بالجبل: الأكل الطيب، البحيرة والمي الجارية، خيمة القش، الأكل بالفخارة، كركة العرق والصاج، الفواكة من الأرض وأكيد مناظر طبيعية رائعة ونفس طيب على الأكل. رح تاكلوا المازة اللبنانية اللذيذة بهيدا المكان يلي بينبض بجو الضيعة والعيلة.

الرقم: 650 119 79

شوفوا كمان، ١٣ شغلة بتصير كل سنة بس نهار عيد الشعنينة.