٣ محلات فيكن تشربوا عندن ألذ قرعة متة
مجربين المتة أو بعد؟ هل مشروب السحري بس تتعرفوا علي رح يغيرلكن حياتكن كلا ويخليكن تصيروا مدمنين قد ما طيب. بنسيكن همومكن وبخليكن تروقوا أعصابكن على الآخر وغير هيك عندو فوايد كتيرة منها إنو بنضف المعدة وبيعطي نشاط وحيوية، خلينا نتعرف على ٣ محلات بيعملوا أطيب فنجان متة.
١. قهوة السوق، بعقلين
مين قادر ينافس أهالي الجبل بالمتة؟ لو بتبرموا العالم كلو مش رح تلاقوا متل متة قهوة السوق لي هيي معمولة على الأصول، بتتقدم مع كاسة قضامة، فواكي مجففة وكل الإضافات لي بتحبوها وأكيد فيكن تصبوا متة قد ما بدكن. غير المتة عندن قهوة وترويقة لبنانية على أصولها وكعك وحلويات ولا أهضم، بتجوا بتاكلوا مع الأصحاب وبترجعوا بتتحلوا وكمان القهوة عندن قهوة بيت. كل شي معمول بدقة وبحب، بتحسوا حالكن ببيتكن وبين أهلكن، الجو دافي والأكل طيب، فيكن تجيبوا معكن جريدة أو كتابكن المفضل وتنسوا الدني كلها.
الرقم: 632 889 78
٢. صاج ريما، الرمليه-عاليه
هل محل بيعمل أطيب مناقيش صاج والقعدة عندو قريبة على القلب ودافية، لازم تجوا على معدة فاضية لتجربوا كل أنواع المناقيش والفطاير لي بتحبوها مع أطيب فنجان متة. المتة بتتحضر قدامكن وبتتقدم مع أطيب الأطباق البيتوتية ومناقيش الصاج والفطاير، هل محل مثالي لتجوا تعملوا صبحية وتشموا هوا نضيف.
الرقم: 236 147 71
٣. كافي نويل
هل كافي المهضوم بيتفنن بتحضير قهوة على طريقة أهالي الجبل ومش بس هيك بتحسوا ريحة نفسها غير، ولكل لي عبالوا يقرقع متة ويرخيها، فيكن تطلبوا أطيب فنجان متة عم تغلي وتستمتعوا بالمنتوجات البلدية لي بيعملوها والبزورات مع كل أنواع الفواكي المجففة. ولأن ما في شي ييجمع شخصين قد مشاركة لقمة طيبة، توجهوا على هل محل واستمتعوا بالقعدة البسيطة والمنتوجات الشهية والمتة الممتازة.
الفروعة: سوق عاليه، بقعاتا، بخشتي، المنارة
الرقم: 145 553 25
شوفوا كمان، ٣ محلات فيكن تطلبوا منن مناقيش على الصاج ببيروت.
