٥ مناطق خضرا لازم تكتشفوها هالربيع بلبنان!

عبالكن تقضوا يوم حلو بالطبيعة تحت دفا الشمس وبين نسمات الهوا؟ بلدنا غني بجمال الطبيعة الخلابة، جبال ووديان وأنهار وشلالات وبحيرات وينابيع، فلقينالكن أماكن طبيعية ساحرة حول لبنان لازم تزوروها، تتمشوا على دروبها، تخيّموا فيها، لتقضوا وقت مميز بأحضان الطبيعة.

1- مرج بسري

بلدة بسري هي بلدة المرج الأخضر والآثار الرومانية، ومرج بسري واحد من أكبر المروج الخضرة وأكتر المناظر الطبيعية الغنية بالتنوع البيولوجي والثقافي من الشجر المعمّر والصنوبر والصفصاف والحور والقصب والسنديان والبحيرات والشلالات المخباية. يعتبر ملجأ للناس اللي بتحب تهرب من العجقة، ومقصد لمحبي رياضة المشي بالطبيعة، بيجتوي على أعمدة غرانيت بترجع للحضارة المصرية القديمة، جسر روماني أثري ومعابد وأحجار رومانية، عدا عن الروحية المسيحية لهل محل. مشواركن رح يكون حافل بالطبيعة الخلابة والآثار القديمة واللحظات الحلوة أكيد!

2- حرش بيروت

فيكن تهربوا من العجقة بأجمل المساحات الخضرة ببيروت، حرش ممتاز لتتمشوا وتروقوا راسكن بين الشجر والعشب، لتقعدوا مع رفقاتكن، وتضهروا مع الولاد، وتستكشفوا الطبيعة المخباية بأحضان العاصمة.

3- وادي قاديشا

كتشفوا كنوز وادي قاديشا هالربيع! وادي قاديشا مدرج على لائحة الأونيسكو للتراث العالمي، بيتميز بتلال صخرية بتخبي أديار مارونية قديمة، كنايس، وكهوف بتكتشفوها على دربكن، سحر وجمال وثروات طبيعية وتاريخية بأحضان الطبيعة الشمالية، من أروع المطارح لتمشوا، تخيّموا، تتسلقوا، وتستكشفوا جنات لبنان الخلابة.

4- محمية عميق للأراضي الرطبة

إذا عبالكن قعدة بأحضان الطبيعة جنب المي، أو عبالكن تستكشفوا منطقة البقاع الغربي، محمية عميق تعتبر من أجمل المناطق الطبيعية اللي ممكن تزوروها بالمنطقة، وهيي أكبر الأراضي الرطبة بلبنان، غنية بالبحيرات والينابيع والأنهار. فيكن تستمتعوا بأحلى جولة بالمحمية، وتتفرجوا على الطيور، تبرموا بالمنطقة وتنبسطوا بالنشاطات البيئية المختلفة، ترجعوا تتعرفوا على الضيع المجاورة وتجربوا أطيب أكل بلدي.

5- محمية أرز الشوف الطبيعية

أكبر محمية بلبنان بتحوي كنوز طبيعية لازم تكتشفوها، بتمتد من منطقة ضهر البيدر بالشمال لحد جبل نيحا بالجنوب، هالمحمية بتتميز بشجر الأرز الشامخ المغطى بالتلج بالشتوية، وبالربيع مخبي ثروات ساحرة الجمال. كل اللي عليكن تطلعوا على المنطقة، تفرشوا الحصيرة، تصبوا فنجان قهوة، وتنبسطوا بنمسات الهوا والمناظر الطبيعية الروعة!

شوفوا كمان، أطيب غدا جنب البحيرة بهل-٤ مطارح خيالية.