٧ مطارح لتقضوا ليلة من العمر بالجنوب

ولأنو عودناكن على المشاوير الحلوة حول لبنان واكتشفنا سوا كنوز مخباية بمختلف المناطق، رح نطلع اليوم على الجنوب ونخبركن عن 7 مطارح ساحرة الجمال لتقضوا ليلة من العمر.

1- يارا إيكو كابين Yara’s Eco Cabin – انصار

بحال إخترتوا بيت الزيتونة أو بيت الضيعة، يارا إيكو كابين بأمنلكن القعدة اللطيفة والرايقة ببيوت حجر على موديل الضيعة القديم، تفاصيل زغيرة بتذكركن ببيت التيتا والجدو، ترويقة لبنانية، وكمان مسبح خاص لتسترخوا تحت الشمس وبين الشجر.

الرقم: 367 979 70 – 952 042 81

2- La Maisonette – كفرصير

بتلاقوا عند La Maisonette القعدة المودرن والمرتبة، جاكوزي لتسترخوا فيه، مسبح لتنبسطوا تحت دفا الشمس، وقعدات تراس ساحرة ومطلة على الوديان بالجنوب.

الرقم: 599 033 03

3- بلو جاي فالي Blue Jay Valley – جزين

بقلب أحضان الطبيعة بتلاقوا مخبى شاليهات خشب، وقعدات تراس بتاخد العقل، وبيوت مكنكنة مع جاكوزي، وكمان خيم تحت ضو القمر، ومسابح مع مناظر ساحرة لغروب الشمس، وحتى مطعم بيقدم مأكولات شهية، قعدة كاملة متكاملة عند بلو جاي فالي!

الرقم: 088 880 78 – 112 811 07

4- دار كاميليا – صور

ما بيكمل مشوارنا على الجنوب من دون ما نزور مدينة صور الأثرية، بتلاقوا بشوارع هالمدينة العتيقة دار واسع بيقدم غرف ساحرة الجمال بخدمات مميزة وأجواء شرقية لتنبسطوا بنهاركن على البحر.

الرقم: 500 771 81 – 082 346 07

5- شاليه المطحنة – بريقع

شاليه المطحنة بيقدم جلسة رايقة على صوت النبع بقلب بيت من الصخر، مخبي جواتو قعدات عربية أصيلة مع أوض كبيرة ومقنطرة، جاكوزي مهضوم، وجنينة ساحرة لتسهروا وتعملوا مشاوي وتستأنسوا تحت النجوم.

الرقم: 229 818 76

6- بيت متّى – جرجوع

بيت متّى وجهتكن المثالية للراحة والاسترخاء بأعالي جرجوع، بتقعدوا بالجنينة تحت شجر الزيتون وعلى صوت نافورة المي، بتستأنسوا بمناظر الجبال وغروب الشمس، وبتجربوا أحلى قعدة بيتوتية بالمنطقة!

الرقم: 648 419 03

7- دار زفتا – زفتا

عيشوا أجواء فاخرة من داخل قصر الأحلام بزفتا، دار زفتا رح يسحركن بشبابيكو المقنطرة، الأثريات، الديكور الساحر، الجنينات المخباية بشجر عمرو سنين، والجلسة اللطيفة بين نسمات الهوا الحلوة، من أجمل المطارح لتجربوها بالربيع.

الرقم: 151 895 81

شوفوا كمان، ٥ مناطق خضرا لازم تكتشفوها هالربيع بلبنان!