عيشوا أحلى تجربة تخييم بهل-٧ مطارح حول لبنان

طلعت شمس الشموسة وبلش يدفى الطقس لأحلى المشاوير بالطبيعة، خصوصي تجربة التخييم الحلوة. إذا عبالكن تعرفوا وين فيكن تعيشوا تجربة تخييم مميزة حول لبنان، كفوا معنا!

1- Pack And Go – إهدن

بتلاقوا عند Pack And Go تجربة تخييم خيالية بأعالي إهدن من قلب فان مهضوم فيه كل شي بتحتاجو! هالمطرح كأنو معلّق بالسما، قعدتو ساحرة فوق الغيوم، وموقعو مميز لتقعدوا تكنكنوا مع النجوم لطلوع الضو.

الرقم: 657 901 71

2- Glamping – مغدوشة

بتطلعوا على منطقة مغدوشة بصيدا وبتلاقوا خيم كبيرة ومميزة مخباية بأحضان الطبيعة، التجربة كتير ساحرة وبتضمّن جاكوزي ومراجيح وأكل طيب ومنظر لغروب الشمس بياخد العقل، هالمطرح عندو أجواء رومانسية وكتير مناسب للعشاق!

الرقم: 707 157 70

3- Cedars Ground Campsite – عين زحلتا، الشوف

مخيّم الأرز بقلب الشوف بيقدم نشاطات متنوعة وممتعة، فيكن تتفرجوا على النجوم، تنبسطوا بسهرات نار، تسهروا مع أصحابكن تحت ضو القمر، وحتى بتلاقوا سينما بالطبيعة. هالمخيّم كمان قريب على كل دروب المشي بغابات أرز الشوف، هيك بيكمل مشواركن بالطبيعة على الآخر.

الرقم: 187 938 03

4- Uphill Chouwen Camping – شوان

منطقة شوان من الأجمل لتزوروها بالربيع ومشهورة بوديانها وبحيراتها الساحرة، ومخيّم Uphill بيقدم أحلى تجربة بهل منطقة، قعدة على الجبال، خيم بقلب الطبيعة، ترويقة لبنانية طيبة، ووقت مميز لتكتشفوا المنطقة مع أصحابكن.

الرقم: 363 869 81

5- الكارافان السري Secret Caravan – البترون

حابين تخيموا على صوت موجات البحر بالبترون؟ الكارافان السري قريب على الشط ومخبى عن العالم بين الشجر، بتلاقوا كارافان كبير بقلبو كل شي ممكن تحتاجو، تخت كبير، زاوية كنبايات، طاولة للأكل، مرجوحة معلّقة بالشجرة، وجلسات بالطبيعة كتير لزيزة.

الرقم: 567 666 81

(@secretcaravan.batroun)

6- River Zen – ملتقى النهرين، الشوف

عبالكن قعدة رايقة جنب النهر؟ River Zen عندو مخيّم على ضفاف النهر بالشوف، بتلاقوا بيوت شجرة، وخيم مهضومة، وبيوت قبة مكنكنة، وقعدات خشب بتاخد العقل، وترويقة على صوت الميّ، وأجواء لزيزة بالطبيعة بتروق الراس.

الرقم: 716 680 71

7- Swings Camp – زعرون، المتن

مخيم سوينغز بيقدم خدمات متنوعة بتناسب الولاد من ملاعب وألعاب حماسية لمختلف الأعمار، كافيتيريا ومنتزه لتتمشوا بالطبيعة وسهرات نار، وخيم كبيرة لتقضوا كم نهار بالمنطقة، مكان كتير مناسب للعيل والكشّاف وحتى ضهرة أصحاب.

الرقم: 648 796 03

شوفوا كمان، أروع ٦ بيوت ضيافة مخباية بالبترون