صبحية بالجبل أو على صوت البحر؟ شوفوا معنا هل-٧ مطارح المهضومة

ما بتحلى الصبحية إلا على أصولها، مشوا معنا على 7 مطارح حول لبنان لأحلى صبحية!

1- ميولي – بترون

بتميلوا عند ميولي لأحلى صبحية بقلب الجنينة، بتدوقوا ترويقة بيتوتية تحت شجر الليمون وبتحسوا بنسمات الهوا اللطيفة. الحلو انو بيقدموا قهوة يونس المحبوبة، وعندن بيوت ضيافة غير شكل لتقضوا أحلى ليالي بالبترون!

الرقم: 516 000 71

2- فرن الصبايا – عمشيت

فرن الصبايا هو عبارة عن فرن لتلت نسوان صرله فاتح 28 سنة بقلب عمشيت، وبيعملوا أطيب المخبوزات والمناقيش، من منقوشة الأورما والبيض، اللحمة بعجين مع عصرة حامض، البيتزا البيتوتية، وأكلة المورقة الشهيرة بالمحل لي هيي هي عبارة عن عجينة رقيقة محشية بالجوز واللوز وطعمها حلو.

الرقم: 880 112 03 – 466 624 09

3- بيت الجبل – دير القمر

الصبحية بضيعة دير القمر أبداً ما بتتفوت! لقينالكن عند بيت الجبل أحلى قعدة بإطلالة ساحرة، بيسرح نظركن بالوديان والجبال والعلالي بالشوف، بنسّم عليكن الهوا وبتعيشوا أروق صباح على أطيب فنجان قهوة.

الرقم: 767 160 71

4- بلو هاوس تي Blue House Tea – الجميزة

الصبحية ما بتكمل من دون أطيب كباية شاي سخنة بترخي الأعصاب، بتلاقوا بلو هاوس تي مخبى بشوارع الجميزة، بيتميز بالديكور الساحر الأزرق وبيقدم أطيب أصناف الشاي على مخبوزات وأكل خفيف مميز!

الرقم: 428 956 01

5- رايز Rays – بترون

عبالكن صبحية على صوت موجات البحر؟ تميلوا صوب رايز على شط البترون، وكلوا أطيب ترويقة على البحر!

الرقم: 703 919 03

6- قهوة 60 – صيدا

أحلى صبحية من أيام الستينات على ساحل صيدا! بتقعدوا عند قهوة 60 على تراس بيطل على البحر، بتدوقوا لبنة بالفريز مع كباية شاي، وبتنبسطوا بأحلى الأجواء على صوت فيروز.

الرقم: 000 196 79 – 001 196 79

7- كرواسون بار Croissant Bar – جبيل

شو رأيكن بصبحية بجبيل، أقدم وأجمل مدن العالم؟ مشوا عند كرواسون بار بسوق جبيل، جربوا أطيب أنواع الكرواسون المحشية بالشوكولا والفريز، وتفرجوا على شوارع جبيل العتيقة.

الرقم: 305 488 81

شوفوا كمان، سمعتوا عن بيت الضيافة الساحر على المينا بطرابلس؟