هيك فيكن تقضوا أحلى نهار بمنطقة بعقلين

ضيعة بعقلين بتترك أثر بقلب كل شخص بيزورها، بناسها وشوارعها وأسواقها وبيوتها وطبيعتها الساحرة، وبهل طقس الحلو ما في أحلى من مشوار زغير على هل منطقة الموجودة بأحضان الجبل لنقضي وقت حلو سوا، مشوا نشوف 6 شغلات لزيزة فينا نعملها ببعقلين.

1- تمشوا بشوارع الضيعة، تعرّفوا على البيوت القديمة وتفرّجوا على العمارة اللبنانية

رحلة زغيرة بتاخدكن على تاريخ الضيعة وأسلوب الحياة البسيط والتراثي فيها!

2- مزمزوا بأطيب فنجان قهوة من عند قهوة السوق

انتو وعم تتمشوا بالسوق، بتلاقوا ريحة القهوة الطيبة فايحة من هل كافيه، والجو مع صوت الناس بالسوق على أحلى!

الرقم: 632 889 78

3- انبسطوا بأطيب غدا جنب الشلال عند مطعم شلالات الزرقا

مطعم جايي من عالم الأحلام جنب نهر بعقلين، بتنبسطوا بغدا طيب على صوت المي، بقعدة رومانسية بالقارب مع الشريك، ورحلة ساحرة بقلب طبيعة بعقلين. بتجربوا أطيب السلطات والمازة، وأطباق محرزة من اللحمة النية مع كاس عرق، مطرح مميز لضهرة مع العيلة خصوصي بهل طقس الربيعي الحلو.

الرقم: 301 560 03

4- تعرفوا على أهل الضيعة وناسها، تحدثوا مع الختيارية لي رح بيحكولكن قصص غريبة عجيبة

بتلاقوا بقلب بعقلين ناس قريبة للقلب وجو بيرد الروح، أحاديث لزيزة بقلب السوق على فنجان قهوة أو كباية شاي غير شكل.

5- زوروا قصر حمادة التاريخي

مجرد ما تدخلوا على هالقصر رح تضيعوا بتفاصيل العمارة الشرقية من زمن الأمير فخر الدين اللي بعدن محافظين عليها لليوم.

6- قضوا ليلة من العمر عند Maison de la Vallee

إذا قضيتوا نهار كامل ببعقلين، لازم تكفوا المشوار عند Maison de la Vallee، بتقعدوا على البلكون وقدامكن أجمل المناظر الجبلية، وبتسرحوا بالطبيعة والشجر، وبتناموا أحلى نومة عندن ببيوت الضيافة، يا عين على البرودات شو حلوين!

الرقم: 832 670 03

شوفوا كمان، هيك فيكن تقضوا أحلى نهار بمنطقة الناقورة.