أحلى ٥ مشاريع مهضومة لهل-ويك إند

شو مشاريعكن للويك-اند؟

كلنا مننطر العطلة مناطرة لنضهر ونتسلى ونروق راسنا، كرمال هيك، مشوا معنا كزدورة زغيرة نروح فيها على 5 مطارح ضروري تجربوها هل-ويك اند.

1- جربوا أطباق مميزة من إيدن الشيف جو ب مطعم بيت سومر

مطعم زغير تحت شجر الزيتون والتين بيستقبلكن على القعدة الونسة والرايقة، جو الضيعة الحلو، أطباق فنية ومميزة من بيتزا وبرغر وباستا مع أطيب مازة، جلسة بالجنينة مع نسمات الهوا وتحت فيّ الشجر، بدكن أحلى من هيك؟

الرقم: 189 651 03 (الحجز ضروري)

2- خيّموا لطلوع الضو عند لو كامب بدير الحرف

المشوار عند لو كامب خص نص لعشاق التخييم والطبيعة، تخايلوا حالكن فارشين الحصيرة بهل طقس الحلو، قاعدين بين شجر الصنوبر بأحضان الغابة والجبل وعم ينسّم عليكن الهوا، مبسوطين بضهرة بيكنيك مع الأصحاب أو العيلة وعم تعملوا ذكريات ما بتنتسى، وبتكملوا مشواركن بأحلى نومة بقلب خيم تحت ضو النجوم والقمر!

الرقم: 677 355 76

3- إركبوا على الخيل وإنبسطوا عند The Ranch بالكورة بالشمال

ضهرة العيلة هل-ويك اند ما بتكمل إلا عند The Ranch بقلب منطقة كفرحزير بالكورة، بيقدم هل مشروع الحلو مطعم ومنتزه وبيت ضيافة ومطرح لتركبوا الخيل وجنينات كبيرة لتقعدوا وترخوها بهل طقس الربيعي، من أحلى المطارح للعيلة والولاد!

الرقم: 618 201 03

4- ما تروحوا عليكن مهرجان الربيع بالبترون

متل كل سنة، مهرجان الربيع بالبترون بيقدم عروض موسيقية ورقص وعزف مباشر، كيوسكات خشب، نشاطات فنية وترفيهية، ألعاب للولاد، أكل وشرب وحلويات، ومعرض للمنتوجات محلية، والأحلى من هيك، الدخول مجاني! أبداً ما تفوّتوا هالجو الحلو والحماسي عليكن!

الرقم: 525 702 76

5- جربوا أطيب لقمة لبنانية على صوت الميّ عند مطعم الطاحونة ببعقلين

ما بيكمل مشوار الربيع من دون نزلة على النهر، مطعم الطاحونة بيستقبلكن على قعدة مخباية بين وجنب نهر بعقلين، بتنبسطوا بأطيب غدا من مشاوي وفتوش والمازة على أنواعها مع نبيد، وبتسردوا مع النهر ونسمات الهوا الحلوة.

الرقم: 802 885 76 (الحجز ضروري)

شوفوا كمان، تعرفوا على ٧ محلات لتستمتعوا بأجمل مغيب شمس بلبنان