تعرفوا على ٦ من أطيب أفران بيروت

وين عبالكن نتروق اليوم؟ مشوا نعزمكن على أطيب أفران بيروت لترويقة لبنانية غير شكل!

1- بيت أوفن – مار مخايل

بيت أوفن عبارة عن فرن لبناني تقليدي، بتدخلوا علي وبتشموا ريحة المناقيش طازة من الفرن، مناقيشو بتتميز بالعجينة الطرية والمكونات المميزة والشهية اللي بتخلي كل لقمة أطيب من التانية.

الرقم: 585 858 78

2- الفرن اللبناني The Lebanese Bakery – الأشرفية

منقوشة الفرن اللبناني وصلت لمختلف المدن حول العالم، من لندن والرياض والقاهرة وغيرها، بيقدموا أطيب مناقيش زعتر وخضرا على أصولها، مخبوزة على الإيد ومقدمة بكل حب!

الرقم: 807 337 01

3- فرن المعجناتي – الحمرا

بتلاقوا كل شي عند المعجناتي، من الفطاير واللحمة بعجين والسمبوسك والمناقيش وكل المخبوزات الشهية، عندن منقوشة “الزعتورة” ضروري تجربوها، وكمان بيقدم مناقيش على مختلف الطعمات بتناسب كل الأذواق.

الرقم: 766 750 01

4- فرن غطاس – الأشرفية

فرن غطاس من الأفران المحبوبة ببيروت وصرلو من سنة ال 1958 بيقدم ترويقة لبنانية تقليدية على أصولها، ما بيكمل الصبح من دون أطيب مناقيش من عندو، وكمان عندو معجنات أشكال ونكهات بتجنن.

الرقم: 132 218 01

5- فرن صنوبر – سوق بيروت

فرن صنوبر بيتميز بتقديم مناقيش مليانة مكونات بتشهي، زعتر ودبس، جبنة ونعناع مع رمان، وكمان لحمة بعجين، بتجربوا ترويقة غير شكل وبتاكلوا صبيعكن وراها!

الرقم: 000 844 76

6- Ichkanian Bakery – زقاق البلاط

إذا عبالكن لحمة بعجين غير شكل ببيروت، ما إلكن إلا Ichkanian Bakery، بيقدموا مخبوزات لبنانية وأرمنية مميزة، بيقدموا اللحمة بعجين بطريقة مميزة، معمولة مع بهارات شهية، والفطيرة غنية باللحمة ، بتجربوها مع عصرة حامض، ويا عين!

الرقم: 586 717 04

شوفوا كمان، ٦ مطارح تجربوها بجبيل بهل طقس الحلو