١٢ شغلة مهضومة بتصير بكل ضهرة مع الرفقا بلبنان

مين فينا ما بيحب الضهرة مع الرفقا والأصحاب ونقضي أحلى وأهضم الأوقات؟ ولنرجعلكن الذكريات ونضحك سوا، مشوا نشوف 12 شغلة بتصير بكل ضهرة مع الرفقا بلبنان.

1- بتقضوا ساعات وساعات عم تخططوا للضهرة

ليجي واحد من الشلة يفكسها آخر تكة

2- بتتخانقوا وين بدكن تروحوا وتاكلوا

حدن بدو بيتزا، والتاني فول، والتالت بدو سوشي وحلّوها إذا فيكن تحلّوها

3- الشرط الأساسي للطلعة: الكل بيشارك بدفع البنزين متل الشاطر…راحت إيام زمان

أو ما في طلعة بالسيارة من الأساس

4- وأكيد ما فيكن ما تتخانقوا على الأغاني بالسيارة

اللي مستلم ال AUX بالسيارة بكون ربا

5- وأكيييد اللي قرر يسوق بدو يضيع الطريق مدري كم مرة

“شو؟ حفظت المفرق للرجعة؟” وبتسمعوا “خرا على الغوغل مابس” مية مرة

6- عطول عندكن بالشلة هيدا الشخص اللي ما خصوا بالدنيا، وين منروح وكيف مش مهم

شغلتو يلبس عليه ويجي… أحلى عالم والله

7- وفي هيدا الشخص اللي لازم يرجع الكل قبل ال 10 بالليل

حتى ما تعيط عليه إمو

8- أكيد حدن من الشلة لازم يتخانق مع حبيبو قبل الطلعة

وبيجي مدمّع وقالبها أمير الأحزان وبيصير يفش خلقوا بالكل

9- وهيد اللي ما بيترك التلفون من إيدو وبدو يصور كل شي عم بصير

وعطول بنزّل الصورة اللي هوي طالع حلو فيها وكلكن شكلكن أبصر كيف، وبياخد معو مية سنة ليبعت الصور بعد ألف ترجايي

10- ومجرد ما توصلوا على المطعم لازم حدا ينق على الأكل والتاني ياكل الأخضر واليابس

وأهم شي اللحظة لي بيوصل فيها الحساب ويصير الكل ساكت وعم يعد المصاري

11- ومدري كم مرة بتوقفوا على الطرمبا كرمال هيدا الرفيق اللي محشور وبدو يفوت على الحمام

“حدا قلك تشرب 5 قناني مي بالبيت؟”

12- وأكيد ما مننسى القعدة حد الرفيق اللي عندو عطول آخر أخبار أكشن وحياتو متل شي الفيلم

“تركت وخربت السيارة وسافرت وفتت على المستشفى 4 مرات هالشهر”

بدكن تضحكوا؟ ١٩ طريقة بتسأل فيها عيلتك اللبنانية عن حياتك العاطفية.