مين مشوب وعبالوا يبورد؟ شوفوا معنا أطيب محل كوكتيل بلبنان

اليوم رح نعرفكن على أطيب محل كوكتيل بلبنان كلو، ما رح تتوقعوا وين لقينا… بطرابلس! متل ما سمعتوا وتحديداً بشارع ضم وفرز: بابايا كوكتيل.

يعني شو بدنا نخبركن عن هل محل، جنة ومفتوحة… في كنوز ملونة وخلطات رح تلون لسانكن وتمكن وتعمل من حياتكن حلم.

كوكتيلات الفواكي هون على أشكال وألوان متل الفريز مو، الميلك شايك شوكولا، قصب السكر، كوكتيل الشقف، البينا كولادا، عصير القصب وغيرن من الإختراعات لي رح تلونلكن حياتكن.

هل محل مش بس بيكتفي بالطعمات المعروفة، بيعمل إختراعات جديدة كمان وعطول بزيد عليها قطعة بابايا.

أما العصير عند بابايا بوجع القلب!

نفس الشي بالنسبة للبوظة الواحد بدو يقوي قلبو لأن طعمتها وشكلها غير شكل!

ومش ضروري تاكلوا البوظة بالقرن، إذا كنتوا من عشاق الفواكة كتير، بهل محل فيهن يعملولكن البوظة محشية ومزينة بحبة بابايا أو حتى قطعة فريز مثلا! وأكيد بطريقة كتير مهضومة ومغرية.

على فكرة هني المحل الوحيد بلبنان لي عندن بوظة على دبكة! البسكويت لي ربينا علي صار فيكن تاكلوا على شكل بوظة عند بابايا.

يلي عبالوا يتحلى على الآخر، جربوا كوكتيل البطيخ… بطيخة محشية كل شي في أنواع فواكة من كيوي، بطيخ، شمام، بابايا، رمان وعصير بطيخ مع قشطة ولوز وعسل بشهدو على الوج بقلب صحن مليان تلج لتبوردوا قلبكن.

على فكرة، القعدة عندو شرحة ومهضومة ومرتبة كتير.

كرمال هيك دوروا السيارة وطلعوا على طرابلس وجربوا كوكتيل بابايا وما بتندموا لأنو ببساطة: كتير مخيف!

للمزيد من المعلومات اتصلوا على 105 446 06

شوفوا كمان، أطيب ٩ محلات بوظة عربية بلبنان.