مبادرة إجتماعية حلوة…وجبات أكل بس ب1$ للناس المحتاجة

خلونا نخبركن اليوم عن “طبخة عزو”، مبادرة اجتماعية من مؤسسة واصف سعاد الصواف الخيرية هدفها تقدم وجبات صحية ويومية بأسعار كتير مدروسة، يعني كل وجبة ب $1، والأحلى من هيك، كل ما تشتروا وجبتين مع بعض، بتروح وجبة لإطعام محتاج!

هدفها للجمعية تساعد الناس المحتاجين حول لبنان بالقطاعات الصحية والتعليمية وكمان قطاع التغذية، وصرلهن فوق ال 10 سنين بيقدموا بهالمجال.

الوجبات اليومية ل “طبخة عزو” عبارة عن غدا وعشا من أطباق وطبخات بيوتية من المطبخ اللبناني، معمولة بكل شطارة ومقدمة بكل حب للناس، والحلو انو الوجبات متنوعة وبتناسب كل الأذواق، بتلاقوا كل شي من الملوخية لطبخة الكوسا محشي مع ورق العنب، بتلاقوا فاصوليا ورز، بازيلا، كفتة وبطاطا، كبة بلبن، رز ودجاج، داوود باشا، مغربية، وكمان رز وفول، وحتى معكرونة وكمان نودلز صينية مع دجاج.

كل وجبة بتضاين 48 ساعة بالبراد، وبقدموهن من الساعة 12 الضهر للساعة 8 بالليل بمركز الجمعية بمنطقة كركول الدروز ببيروت. وإذا عبالكن تعرفوا شو الطبخات اللي محضرينها، فيكن تشوفوا البرنامج الأسبوعي بالموقع هون. وإذا حابين تتبرعوا لهل مبادرة، بتلاقوا كل المعلومات بالرابط هون.

تابعوا آخر أخبار المبادرة على حساب الجمعية على الإنستغرام بالرابط هون، وللمزيد من المعلومات،

اتصلوا على 555 774 76 – 882 815 01

شوفوا كمان، ٤١ وجبة تحت ال000 500 ل.ل. فيكن تطلبوهن لما يضرب الجوع