بيت النسيم: أوتيل الحكايات والأصالة بطرابلس
اليوم رح نبرم بشوارع المينا القديمة بطرابلس، صوب البحر والبيوت القديمة، عجقة السوق والبياعين، ونوصل على حي زغير ومخبى، بتلاقوا بهل شوارع بيت النسيم، عبارة عن أوتيل الحكايات والأصالة بقلب طرابلس، لازم نخبركن عنه!
بيت النسيم بيت من عصر العثمانيين ومحافظ عليه لليوم، أوتيل بيتميز بأسلوب العمارة القديم من قناطر عالية، الصخر القديم، السقوف الخشبية والسقوف العالية المفتوحة، القزاز الملون، المصابيح العتيقة، والجو التراثي المميز.
مطرح كتير حلو لمحبي القصص القديمة، بياخدكن على الزمن الجميل مجرد ما تدخلوا عليه، مزيّن بالتحف والأثريات والأنتيكا، بتنزلوا على المكتبة وبتشموا ريحة الكتب القديمة، قعدة المكتبة مميزة لتقعدوا على رواق وترتاحوا مع حالكن. كمان بتلاقوا ديوان كبير لمحبي ممارسة اليوغا والرياضات الروحية، أوتيل بجنن اللي عبالوا يروق راسو يومين تلاتة بطرابلس ويكتشف المنطقة.
جو الأوتيل مريح وقريب على القلب، بيقدموا كذا أوضة نوم بموديلات متنوعة وبتناسب الكل، التخوتة مريحين والقعدة خاصة على الآخر.
بيت النسيم بحد ذاتو جوهرة، فيكن تتمشوا بالجنينة، تقعدوا تحت شجرة الزيتون، تمشوا على الجسر السري المخبى بالأوتيل، وتطلعوا على التراس لتنبسطوا بفيو غير شكل لمدينة طرابلس الشعبية.
الأوتيل بيقدم ترويقة مميزة الصبحيات، بقعدة تراثية وعلى أصولها كتير بتستأنسوا فيها!
للمزيد من المعلومات، اتصلوا على 156 308 03
شو، بتروحوا معنا على بيت النسيم بطرابلس؟
شوفوا كمان، ٨ بيوت ضيافة مميزة مخباية بأنفة
