بيت المزرعة: قعدة جبلية وأجواء ريفية غير شكل

عبالكن نروح سوا على مطرح بعيد عن العالم؟ لقينالكن جوهرة مخفية بجبال عاليه، مطرح معلّق بين الأرض والسما بمنطقة عين الحلزون. تعرفوا على بيت المزرعة The Farmhouse بيقدم قعدة جبلية وأجواء ريفية غير شكل.

بيت المزرعة بقدملكن فرصة تعيشوا الأجواء الريفية من بيت جبلي قديم بقرميد أحمر وشبابيك خشب ومغمور بالنبات المعلّق، قاعد على راس الجبل وعندو منظر بياخد العقل لجبال الباروك والمشرفة وغيرها.

بتلاقوا عند بيت المزرعة قعدة تراس بنفس جبلي وبيلعب فيها الهوا لعب، قعدة فيّ بين الشجر وقدامكن الجبال الساحرة. بتقعدوا على التراس بقعدة ضيعة وبتشربوا قهوة طيبة وبتسرحوا بالمناظر الجبلية، وعلى الغدا فيكن تعملوا أطيب المشاوي مع أحبابكن.

بيقدم هالمطرح نشاطات زراعية وريفية متنوعة وخبريات حلوة بقلب الطبيعة. فيكن تلعبوا مع الغنمات والدجاجات بالمزرعة، وتفتلوا بين كروم العنب، وتقطفوا من الشجر وتاكلوا الفواكة طازة من البستان!

بتقدروا تطلعوا على الدراج الحجر اللي بتطل على المنطقة كلها، تعملوا Hiking بين جبال المنطقة، تنبسطوا بدروب مشي ساحرة الجمال، وتكتشفوا كنوز مخباية بقلب الطبيعة، وبالليل تنبسطوا بأحلى سهرات النار بالجبل.

وإذا عبالكن تقضوا الليلة بقلب بيت المزرعة، بتلاقوا عندن جو بيتوتي وأوض نوم مريحة ومجهزة بكل شي بتحتاجوا، والقعدة الصبح على التراس رح تخلي عطلتكن مميزة على الآخر.

للمزيد من المعلومات، اتصلوا على 004 958 81

شوفوا كمان، ٥ مطارح ساحرة لتقضوا ليلة مميزة بالبقاع