كافيه Forest Rose: قهوة طيبة على ريحة الورد بشوير

اليوم إطلعنا على منطقة ضهور الشوير بأعالي المتن وجبنالكن جوهرة مخباية بالمنطقة لكل محبي القعدات الحلوة. خلونا نخبركن عن كافيه فوريست روز Forest Rose مطرح جديد لكل قعداتكن بالمتن. بتلاقوا عند كافيه فورست روز القهوة الطيبة والقعدة الحلوة على ريحة الورد الجوري. مشوا نشوف شو مخبيلنا!

أول ما تدخلوا على كافيه Forest Rose رح تستقبلكن قناطر من الورد الأحمر وقعدة تحت فيّ الشجر روعة. بتقعدوا على تراس مليان خضار وبتفوح منو ريحة الورد الجوري، بالهوا الطلق وقدامكن الطبيعة الحلوة وعالم من الورد.

كافيه Forest Rose مطرح مميز لتقضوا صبحية مهضومة مع أصحابكن أو تشتغلوا على رواق مع فنجان قهوة غير شكل. كمان بيستقبلكن بالليل على أجمل سهرة رومانسية مع الحبيب تحت ضو القمر. كافيه مميز لمحبي القهوة وقعدات الرواق والطبيعة الحلوة.

هالكافيه مميز إذا عبالكن شي طيب وخفيف هالصيفية. القهوة عندن بيقدموها بطعمات مميزة ومقدمة بفناجين ملونة ومهضومة، بتلاقوا كمان عصير فريش وحلويات طيبة متل الوافلز مع أشهى الإضافات! وكمان بوظة طبيعية مع فواكة وصوص بتشهي! بتميلوا على هالكافيه انتو والولاد وبتجربوا حلويات وبوظة مميزة خصوصي بالشوب!

في أحلى من القعدة بالهوا الطلق بين وردات الجبل؟ خلونا نجرب كافيه Forest Rose هالصيفية!

للمزيد من المعلومات، اتصلوا على 728 502 81.

شوفوا كمان، ١٦ مطعم بقعدة مميزة جنب النهر حول لبنان