تاريخ شارع الحمرا، وأول عيل سكنوا فيه!

بتعرفوا كيف كان شارع الحمراء بأيام الزمان؟ اكتشفوا كل قصصه الخفية معنا بحلقة اليوم من الذاكرة الجماعية مع الراوي طارق كوّى.

جيت بدي احكي عن شارع الحمراء مصادر كتير، قصص كتير…قلت احسن شي برجع بالتاريخ ل 1404. كان فيه عيلة تلحوق وساكنين بهالمنطقة، وهالمنطقة كان اسمها جرن الدب وكان فيه بني الحمراء اللي هني عيلة بقاعيين كانوا ينزلوا على منطقة بيت تلحوق او آل تلحوق على جرن الدب ويبيعوهن محاصيلهن الزراعية. وصار أزمة كبيرة بين العيلتين بيت تلحوق تركوا جرن الدب، و بنو الحمراء استوطنوا محل بيت تلحوق وسموها كرم الحمراء وفي ناس كانوا يقولوا انه اسمها بستان الحمراء.

وسنة 1407 بنو الحمراء اشتروا من رهبان كنيسة المخلص القديمة يلي كانت مهدمة اشتروا الحجارة تبعيتها وعمروا فيهن اول مدرسة لالهن. وقبل ما نقرب لسنة 1914 والتغيير يلي بلش يطرق على بيروت خارج السور، لابد انه نوقف عند تأسيس الكلية السورية الانجلية الجامعة الامريكية سنة 1866 والتغيير يلي جابته لرأس بيروت ككل. هات لنرجع لشارع الحمراء بال 1914 ل 1918 كانت المنطقة حول شارع الحمراء بساتين.

وكان اهلها مهتمين اكتر شي يزرعوا شجر المأساس. هلا شجر المأساس يلي بيطلعوا منه الصمغ يلي بيعملوا منه دبق لاصطياد العصافير، وكانت هاي تجارة مربحة يعني يطلع الواحد اثنين عثملي بالنهار. شارع الحمراء بذاته كان خندق اسمه خندق ديبو، يعني انجق يقدر يمرق الواحد هو والدابة تبعيته. والمنطقة حول شارع بليس جاندارك والمكحول كان اسمها زقاق الطنطاس. ب 1918 خلصت الحرب فات الحلفاء على بيروت والشارع يلي حيصير شارع الحمراء سموه شارع لندن والشارع يلي حيصير جاندارك سموه شارع شامبانيا. وهيدا الوقت يلي بلشت الناس تنتقل من باطن بيروت لمنطقة الحمراء وجوارة. الخلاف اي اول بيت اتعمر بالحمراء…سنة 1923 بروفسور سيلي كان بالجامعة الامريكية عمر اول بيت عصري محل الهورس شو.

وناس تانيين بقولوا اول بناية اتعمرت هي بناية زيكو يعني اللي فيها صيدلية المدينة وسكن فيها حبيب ابو شهلا. هلا الكل بيجمع انه يوم يلي شركة تابلاين فتحت مكاتبها بالبناية اللي بوج المودكا سابقا، كان البداية لتغيير هوية شارع الحمراء من شارع سكني الى شارع اقتصادي مميز. ب 1933 محافظ بيروت كان اسمه سليم بيك تقلا.

هو اخد قرار بتزفيت شارع الحمراء والشوارع المحيطة فيها، وبلشت البلدية وقتها تسمي الشوارع المحيطة بشارع الحمراء باسماء العائلات اللي كانت عايشة فيها بذك الوقت، متل عيتاني وربيز وصوراتي ودياب وكتير من العائلات هيدي كان عندها المصيد الخاص تبعها على الشاطئ. وعيل تانية متل بيت الفاخوري كان عندهم فاخورة على الحمام العسكري، بيت حمندي الفاخورة تبعيتهن كانت فوق على الضهرا، يعني الروشة.

وهون بدنا نرجع لتأثير الجامعة الامريكية اول ما تعمرت الجامعة صار اعتراض كتير من اهل بيروت لانو عمروها كتير بعيد عنن يعني اللي بدو يروح عالجامعة بدو دابة، بالليل واوية، ما بيقدر يمشي وبالنهار اذا بدو يمشي كلها صبار ورمل…بس كل هيدا تغير بالخمسينات واوائل الستينات وهون كان التأثير الاساسي على منطقة الحمراء وعلى شارع الحمراء بشكل خاص.

التلاميذ صار بدهن اوض يستأجروها ليسكنوا فيها، صار بدهم مطاعم صغيرة لياكلوا، بدهم وسائل ترفية ونتيجة لهيدي الطلبات بلش يتطور شارع الحمراء بسرعة كبيرة جدا فتحت فيه السينمات، المقاهي، المطاعم، وهل 1300 متر من الاتوال ل ابو طالب صاروا الأشهر بالشرق الاوسط.