تعرفوا على ٤ بيوت ضيافة مميزة بصيدا

عبالكن تقضوا كم يوم بعاصمة الجنوب صيدا؟ صيدا وحدة من أقدم المدن الساحلية ومخبية تراث وتاريخ غني بين آثارها وشوارعها، مدينة بتكتشفوا فيها جواهر مخفية وكومة جمال. خلونا نعرفكن على أجمل 4 بيوت ضيافة بصيدا.

1. بيت التوت، صيدا

هالبيت التراثي عمرو أكتر من 250 سنة، مخبى بين أحياء صيدا الشعبية. بيتميز بقعدة رواق تحت شجرة التوت بقلب جنينة خضرة و ديكور قديم بيرجعكن بالزمن لورا. من أجمل بيوت ضيافة بصيدا لتقضوا وقت عم تكتشفوا بالمدينة وقريب من كل شي حلو فيها!

الرقم: 036 013 03

2. شيصار كابن – عين الدلب، صيدا

شيصار كابن عبارة عن بيت شجرة مهضوم بضيعة عين الدلب بصيدا. بيت خشب مخبى بالطبيعة، عندو قعدات تراس بإطلالة حلوة، مسبح زغير للعيلة، وقعدة جنينة بين الورد وعلى الهدا. بيطل على مناظر خلابة للطبيعة وقعدة بعيدة عن العالم.

الرقم:  547 720 71

3. Glamping – مغدوشة، صيدا

إذا عبالكن تجربة رومانسية بتحسسّكن كانكن سافرتوا بصيدا، ضروري تجربوا Glamping بضيعة مغدوشة.

هالمطرح بيقدملكن جو بياخدكن على جزيرة إستوائية، دوش وجاكوزي بالطبيعة، مرجوحة وتراس مع منظر للبجر من بعيد، مسبح وتخت بالهوا الطلق، تخييم وأكل طيب ومساج وخدمات مميزة بتعيشكن شهر عسل غير شكل!

الرقم: 707 157 70

4. Saida La Vie، ساحل صيدا

هالبيت بيقدم بلكون بيطل على بحر صيدا غير شكل. بيتميز بجو مريح وقعدة مرتبة، قريب على أطيب مطاعم المدينة والسوق القلعة كمان. كتير مناسب لعيلة حابي تغير جو بالمدينة، يعني في أحلى من إنو تفيقوا الصبحيات وتتمشوا على الكورنيش؟ للحجز، شوفوا الرابط هون.

شوفوا كمان، أجمل ٥ أوتيلات موجودة بالجبل بلبنان