مشوار تشرين، كيف فيكن تقضوا نهار مميز بفنيدق القموعة؟

شو رأيكن اليوم نكتشف جوهرة مخفية بلبنان؟ الرحلة رح تكون ع ضيعة القموعة العكارية، ضيعة متل الحلم مليانة طبيعة ساحرة وجواهر مخفية ومغامرات ممتعة. هلق رح نحكيلكن كيف فيكن تقضوا نهار مليان سحر ونشاط وراحة بضيعة فنيدق القموعة.

شو فيكن تعملوا بقلب طبيعة القموعة:

1. مارسوا ال Caving أو إكتشاف الكهوف بقلب مغارة نبع فنيدق

مغارة مخفية عن العالم، فيها مجرى النبع ومناظر روعة. بس ما تروحوا من دون إرشاد من المجموعات السياحية المحلية بعكار متل Discover Akkar.

2. عملوا Hiking بقلب غابة العزر بالقموعة

وحدة من أجمل الغابات بلبنان خصوصي بالخريف، وفيها دروب مشي بتجنن.

3. خيموا بقلب الغابة مع أصحابكن لطلوع الضو

الغابة فيها أجمل المناظر والقعدات للتخييم، كل اللي عليكن تحضروا الخيمة والأكل وتنطلقوا على هالجنة. فيكن تعملوا مشاوي، نزهة، وتتفرجوا على سما مليانة نجوم بالليل، وتفيقوا الصبح على ترويقة ورواق بالغابة. 

4. مارسوا ركوب الخيل بمطل سهل القموعة

إركبوا الخيل، تفرجوا على المناظر الخلابة، وبرموا ساحة الضيعة كلها.

وين فيكن تاكلوا لقمة طيبة بالقموعة:

5. جربوا ترويقة طيبة أو غدا مشاوي عند مطعم غابات أرز القموعة

مطعم مميز بساحة الضيعة، عندن فيو روعة لسهل القموعة.

وبيقدموا أكل لبناني طيبة وسفرة كريمة. والحلو انو في مدينة ملاهي قريبة للولاد يلعبوا وحتى بيوت خشب تقضوا ليلة فيها!

الرقم: 080 355 03

وين فيكن تقضوا ليلة غير شكل بالقموعة؟

6. منتجع الكهف ناطركن على أحلى قعدة رومانسية من فوق الجبل

بيوت خشب قاعدة على حفة الجبل، فيها كل وسايل الراحة والقعدة البعيدة عن العالم بقلب الطبيعة.

بتفيقوا على ترويقة لبنانية طيبة، رواق الجبل، ومناظر من الخيال للطبيعة.

الرقم: 103 411 70

7. وإذا انتو عيلة، شاليهات الشوح بقدملكن أحلى قعدة عائلية بالطبيعة

بيوت خشب كبيرة، جنينة للولاد، وقعدة رايقة بالطبيعة بين الشجر.

الرقم: 914 242 03

8. شاليهات سما القموعة عندن قعدة لطيفة لجمعة أصحاب أو عيلة

مطرح بيطل على مناظر طبيعية ساحرة بالقموعة، عندن أكل طيب، سهرات نار، وجو مكنكن ومريح للجمعات.

الرقم: 099 952 71

خبرونا، حبيتوا مشوارنا ع ضيعة فنيدق القموعة بعكار؟